𠵱家咁嘅時勢，錢擺喺銀行最穩陣，買新車？對真正用家嚟講，送包圍送乜送物都冇乜攻擊力，最容易K.O.佢哋引發消費意欲，減價係最實際必殺技。ImprezaS-GT，2.0公升有Turbo有四驅，動作敏捷過春麗，有聲有畫，揭背五門五座，實用過軍佬嘅橫鞭槌，大力又夠Cool，08現貨減三萬蚊，5速手波版廿一萬唔使，咁嘅價錢，你都可以做阿龍，波波盡呀！
文︰嘴嚼爺
攝影︰陳盛臣
Model︰Phoebe@StageModel
咩棍都好玩
同《街霸IV》一樣繼承最強系統，Impreza2.0S-GT流着高性能WRX血統，有台2.0Turbo引擎，最大馬力達250匹，不過都唔夠34.0kgm扭力強，加速力吼吼聲，同時諗起個着數車價，起步嗰份爽快感真係過足癮。手波平一萬最抵玩，仍然處於「玩車梗係棍波好」年代嘅硬派車迷，一上車見到支5速波棍真係開心過買到《街霸》專用大掣，Chok一Chok波波盡，緊密波段操控手感更加直接，喺街見到同級車價對手，啪低一個波，K.O.對手快過瞬獄殺。自動波都唔係話唔好，冇手波牌唔使諗，懶人如我都諗都唔諗，貴一萬蚊開車用少隻腳用少隻手，紅隧過海都舒舒服服，而且亦有4速加減波畀你玩，簡簡單單上上下下已經可以玩得好叻，所以我鍾意用軍佬囉。
着西裝的蘇聯佬
Impreza獨特而沉厚嘅聲線，離遠已經要讓路。除咗把聲，車頭冚大大個渦輪增壓入風口就好似蘇聯佬嘅肌肉，打得更加睇得，繼續都有「掃把佬」車系嘅惡辣感。不過Impreza2.0S-GT擁有五門揭背車型，除車頭惡啲，其實辣味已經比較內斂，即係就算俾阿爸阿媽見到都唔會「哦」你揸快車。就算上埋車，其實呢架車個懸掛都調校得比較房車化，保證老人家都坐得舒服，星期六日家庭樂都唔會太飛仔，着番件西裝可以做番個穩重男人。影相當日雨綿綿，如此濕地就好似專係為Impreza2.0S-GT而設，其實之前都試過，不過濕地更能體驗到四驅系統帶嚟嘅操控感。呢啲濕又濕唔晒嘅路面狀況，唔好話揸車，用對腳行都覺得跣，啱啱揸完架殘胎頭轆車返工嘅我，更能感受到。今日踩深啲，轉急彎都好可靠，跑山路入清水灣梗係一流，轉多兩個彎，已經唔想做穩重男人，我都係想玩手波版呀！
富士ImprezaS-GT
引擎：1,994c.c.，水平對向四汽缸DOHCTurbo
馬力：250匹/6,000rpm
扭力：34.0kgm/2,400rpm
傳動：4前速自動波，四輪驅動
車價：$215,500（自動波）/$209,800（手波）
查詢：意美汽車（25112727）