高調話A、H股已經見底嘅中國私募基金教父趙丹陽坐言起行，強勢回歸闊別咗一年嘅A股。旗下赤子之心資產管理公司，已經搭上花旗銀行，合作搞咗一個新嘅香港基金，名為「赤子之心自然選擇基金」，諗住借助QFII（合格境外機構投資者）額度曲線回歸A股。但同以往一樣，高門檻隔住咗一班捧場散戶，入場費要成195萬港紙。嘩！夠買過百手大笨象噃。
新基金喺上個月底開始招售，下個禮拜三（18號）截飛，當日會隆重登場，可以進出香江H股同埋內地A股，玩埋寶島、獅城同花旗國股票都仲得，畀晒機會趙丹陽大顯身手。
舊年初滬A股仲喺5000點高峯，趙丹陽喺眾人皆醉嘅時候當機立斷，將旗下5隻A股信託基金清盤離場，結果有幾威，唔使華華講嘞啩！