金融海嘯令好多人身家縮水，但亦有好多仲有能力捐錢嘅慈善家。福布斯亞洲第二年選出亞太區48個慈善家，喺12個地區各選4名慈善家，但就冇排名。香港今年上榜嘅慈善家有恒隆地產（101）主席陳啓宗、何東家族後人何鴻章、長江實業（001）主席李嘉誠，同埋深圳彭年酒店主席余彭年。除咗李嘉誠冧莊外，李兆基、米高嘉道理同埋施永青今年都被out出局。
超人唯一冧莊
福布斯話，Ronnie陳啓宗入選，係因為捐錢重建北京紫禁城入面嘅長樂宮，仲捐助獎學金同醫學研究。而何鴻章捐過幾百萬美金畀美國教育機構，亦喺亞洲為災民同貧民提供援助，佢以上帝嘅一句說話做座右銘：「除非你行善，否則你一無所有。」
因為捐出李小龍故居做紀念館，而廣為港人所識嘅余彭年，佢捐咗超過3億美金（23.4億港元）做善事，仲話第時會將所有資產捐晒做慈善用途。至於香港首富超人李嘉誠，福布斯話佢累積已捐出10億美元（78億港元），舊年李嘉誠基金捐出超過3000萬美金救濟四川大地震，成為最大救災金額之一。內地方面，碧桂園（2007）嘅楊國強父女捐出近千五萬美金畀四川師生，因而上榜。
華華覺得，做善事唔一定要計較捐幾多錢，有心就得，無論金融海嘯有幾嚴重，香港仲係全球最富裕嘅城市之一，如果有能力，千祈唔好怕捐得少而唔做善事幫吓人。
李華華
mailto:[email protected]