「你供唔供呀？」成為近期政圈熱爆問題，唔少揸住大笨象嘅人士都心大心細，唔知仲瞓唔瞓身落去好。手持9萬幾股大笨象嘅醫學會噚晚開董事會，集思廣益後終於決定動用超過110萬元供股。會長謝鴻興話，該會投資小組同專家研究後，認為供得過。
低吸中資金融股
真金白銀用百幾萬供股，對普通人嚟講唔係小數目，好彩醫學會有足夠現金，唔使向會員伸手。謝醫生話如果醫學會唔供股，所持股份就會被攤薄，長遠可能蝕底㖭。據知醫學會有近三成流動資產係大笨象股票，近幾個月中資金融龍頭股急跌，醫學會亦有吸納長揸。唔少醫生係投資高手，醫學會決定供股，唔知對散戶有冇啓示。
八方聽聞民主黨李永達都係大笨象粉絲，諗住長揸過世，大笨象勁跌可能好傷，點知佢先知先覺，早排已經沽清滙豐，𠵱家一股都冇，供股唔使預佢，不過高達堅拒透露幾時沽咗幾多貨，費事俾人幫佢數身家，更怕刺激其他坐艇黨友。