內地A股急彈，港股氣氛亦稍為好轉，大象繼續落山，已再拖唔低個市，大中小股表現得好雀躍，特別係中資陣營股份，紛紛起步上山，恒指收市就升近300點，H指更大升330點，而上升正股更超過600隻。
內地A股在上月中創出反彈新高後，足足調整咗兩個星期，上海A股指數都跌咗300多點，噚日升勢又再起，大升133點，升幅6.1%，其中以內房股、資源股表現較突出，中段之後，金融同保險股亦跟上，帶動港股由低位回升。
3隻電力設備股在50大上升股中全部上榜，東方電氣（1072）最勁，排第8位，收14.9元，升幅16.9%；上海電氣（2727）緊貼其後，高收2.22元，升16.2%；哈爾濱動力（1133）排第43位，收4.76元，升幅10.7%。東方電氣噚日波動好大，最高曾見17元，大升33.4%。
3股之中，哈動往績同預期PE都係最低、最吸引，噚日升勢落後，短期應有力扒番頭。
未來三年盈利穩增
哈動07年（12月結）盈利15.2億元人民幣（下同），08年上半年賺5.58億元，減9%，主要係滙兌虧損有2億元，下半年應再無此項目，估計全年盈利12.5億元，每股盈利0.9元（折1.02港元），預測PE只係4.7倍。至於上電同東電的預測PE，則分別為9倍及25倍。
08年6月底止半年內，哈動新接定單343億元，增長55%，令定單總額上升到950億元。原料價格回落對哈動好有利，邊際利潤回升，及獲得大量定單，未來3年盈利增長已有保證，估計09年盈利可達14億元，PE更低。
哈動「走出去」亦取得好成績，出口多個海外新興國家市場的產品持續增長，加上內地振興經濟令電力需求回升，電力設備需求的實質增長會高於市場預期，國內外業務展望俱樂觀，哈動股價會有頗大上升空間。
哈動歷史高價29.4元，現時4.76元，仲大跌83%，亦比每股資產淨值6.31港元為低。今年1月初，哈電高價7.55元，近日跌到4元才回升，以反彈前跌幅的0.5計，股價已可重上5.77元，升兩成。
郭兆誠