不經不覺，南華足主羅傑承嘅《南華飯堂》，已經嚟到第5集，今集同羅傑承邊食邊講嘅，就係南華隊長李海強。唔知係唔係強哥嚟咗香港幾年，感受到言論自由嘅可貴，定係由前歌手車婉婉主理嘅粵菜館，整咗個「誠實」菠蘿叉燒包畀強哥食，今期《南華飯堂》認真多嘢爆。
國足一代不如一代
被譽為「黃金左腳」嘅強哥，2002年曾入選中國國家隊，對於國足近期水準江河日下，淪為亞洲二、三線球隊，佢老哥都感慨良多；強哥話國足漸走下坡有幾個原因，首先教練水準方面，冇不停吸收新知識，只靠在職經驗，將心得一代傳一代，咁樣只會訓練出「一代不如一代」嘅球員。
內地球員報細數
強哥越講越興奮，仲踢爆國內球員喺證件上改細年齡，例如13歲改成11歲；咁樣參加U11嘅比賽時，自然就可以憑較佳嘅身體狀況，輕易擊敗對手。睇到呢度，我求大俠就忽然醒起，京奧期間就有國外傳媒指中國女子體操隊報細數，甚至𠵱家打緊NBA網隊嘅前鋒易建聯，都有外國傳媒話佢報細數。呢個敏感問題，強哥都敢講，真係夠晒「吉士」。
想嬌妻在港添丁
講完國家大事就講家事，已經有女萬事足嘅強哥，有意計劃畀空姐愛妻嚟香港「靜雞雞」生第二胎，以避開國內嘅「一孩政策」。雖則話羅湖站每日都有好多國內孕婦準備落嚟香港生，但如果強哥畀足醫院診金，我求大俠都好希望強哥可以追番個仔，第時隨時成為新一代香港中場指揮官㗎！不過呢啲嘢始終都有走法律罅之嫌，都係奉勸強哥低調行事。
幾日前，藝人張栢芝就淫照事件，「站出來」大踢爆；估唔到，強哥克服膝傷後，亦同樣「站出來」大踢爆。點都好，我求大俠都要恭喜強哥重返綠茵場，佢同羅生嘆完美味粵菜，希望佢今日生生性性，幫南華擊敗天水圍飛馬，殺入聯賽盃4強嘞！各位想睇第5集《南華飯堂》，請瀏覽： http://hk.myblog.yahoo.com/scaablog/article?mid=119925