謝婷婷上年殺入模界，不足一年便搶灘成功，早前她接受本報訪問，雖然謝絕談戀事，但就大談showbusiness，她不諱言部份功勞歸於「謝家效應」，然而「入名校後都要靠自己」，以後的路也要自己走下去。
撰文：RitaLeung
攝影：RickyIp
髮型：RayChanofIlColpoGrandHyatt
化妝：OmixB
場地：OneHarbour（君悅酒店）
現年26歲的謝婷婷畢業於加拿大英屬哥倫比亞大學心理學系，挾着父母之名，上年殺入模界，輕易打入高檔次celebritymodel行列，逆市下出席活動閒閒地便收兩、三萬出場費，上月憑與安志杰的緋聞效應，更攀升至六萬元，貼近天王嫂樂基兒和熊黛林的騷價，難怪婷婷日前說：「𠵱家發展幾理想，呢行搵錢唔算好辛苦。」
想做球星經理人
身為藝人第二代，婷婷入行以來發展不俗，相信謝家護蔭居功不少，她說：「我始終姓謝，係謝賢個女，霆鋒個妹，好似一家人想入名校，爹哋媽咪識得校長幫你入到去，之後會唔會俾人踢出校，考A定B，係靠自己。我讀書時做每一項運動都要贏，唔想自己失望。」問婷婷有否遺傳謝氏的演藝細胞？她笑說：「阿哥真係有，我都有，但就鍾意唱歌。佢哋唔會要求我搵好多錢，或者嫁個有錢人，只要做事有原則、有禮貌同家教就得。」
婷婷05年畢業回港，上年找到人生第一份工作──模特兒，她說：「由頭到尾冇諗住入行，返到香港未有嘢做，所以朋友建議我入行。」問她會花多少時間在這個行業發展？她說：「唔會有乜嘢計劃，我反而想去美國做sportsagent，幫美式足球運動員做經理人。」
習慣公開私生活
入行後，婷婷慢慢習慣將私生活與公眾分享，她說：「𠵱家入咗行，明白會有人跟住我，我唔會set底線，不過都唔好測試我底線去到邊，尤其係牽涉到我姪仔（Lucas）。」她又謂模特兒的收入足夠她的生活：「𠵱家有自己嘅信用卡，請人食飯係自己請，𠵱家真係大個女。」那麼如何答謝父母？她說：「得閒請老竇飲餐茶，佢會講笑話：『多謝，謝小姐』佢哋咁辛苦湊我，見我可以照顧自己，已經好開心。」
品評家人衣着
謝婷婷的時裝養份自小由父母灌溉，她讚父親是其fashionicon，狄波拉永遠gorgeous，哥哥謝霆鋒則太自我。
爸爸黑幫大佬
不少人覺得謝賢的打扮與KarlLagerfeld相似，婷婷說：「我唔會咁形容佢，佢將頭髮『立』起，成日戴住眼鏡，好classy。」她更分享型爸爸穿衣趣事：「我嗰時喺加拿大讀書，朋友以為佢係黑幫大佬。」
媽媽花枝招展
狄波拉的衣着永遠花枝招展，婷婷笑說：「媽咪着衫反映佢嘅personality，好gorgeous。」
哥哥循環再着
外間一向覺得謝霆鋒不修邊幅，婷婷說：「有次我同佢講去頒獎禮唔可以咁着，有時佢想同一件衫再着，我覺得notbad，唔通買一件衫只係着一次？我哋咁辛苦搵錢買件靚衫，點解唔可以再着。」
