大笨象向股東伸手，散戶左計右計未知供唔供股好，大戶更多嘢考慮，東亞寶哥哥係銀行家，對於是否供股，佢噚日話東亞持有滙豐，佢個人亦有小量股份，八方問佢點睇大笨象供股，佢話：「好難睇，到時睇睇先啦，要睇番價錢係點。」
泛民人心大心細
城中其他富豪都供股，甚至做埋包銷，寶哥哥「好朋友」據講亦落叠，點解寶哥哥咁猶豫呢？佢自己都係做銀行，睇嘅嘢可能同一般小股東唔同啦。
白鴿黨對撐大笨象亦心大心細，涂謹申話自己只有一手，供唔供要諗一諗，唔係錢嘅問題，要計吓值唔值得。
李華明亦係大笨象一手股東，佢自嘲身形係肥仔明，投資卻係黑仔明，120蚊左右買入大笨象，唔知幾時返家鄉，其他投資亦因金融風暴大縮水，勁無奈。何俊仁亦有幾手大笨象，佢話暫時未有詳細研究供股問題，或者問吓專家意見先決定。
香港政圈熱論大笨象供股，雲集北京開會嘅人大、政協亦十分關心呢個問題，據講呢兩日吹水話題都離不開大笨象，國家大事都要行埋一邊。