唔關金融海嘯事，法國牌子雷諾本身慢工細貨，唔熱衷於猛出新車，淨係睇今日呢架早於06年以概念車姿態曝光嘅Koleos，要細執到08/09先量產推出就知。城中熱話唔係久候嘅期待，而係新作係集雷諾、三星同日產三大巨頭結晶品，難怪見過試過架Koleos，由外形到操控，都有種法日韓混合風味，又溝得唔錯喎。
記者：徐影龍
攝影：伍慶泉
Model：Sally@StageModels
法式外觀
雷諾本身以揭背Cilo最為人所知，雖然都出過RV車種，不過今日呢架SUV絕對係新嘗試。06年日內瓦Carshow已出現Koleos概念車，一早講明呢架由雷諾設計、日產技術支援、三星製造嘅混血兒，唔會咁早量產出街，起碼要等兩年，集合法日韓最高技術嘅成品，的確令車迷期待。支票兌現，08年Koleos於歐美先行推出，幾個月後熱辣抵港，代理做嘢算幾快手。
Koleos食番潮流，玩時下最興嘅小型SUV，外形跟當初概念款相差唔算太大，都係着重較平實不浮誇嘅Design，無咗滿身肌肉感，換嚟雷諾一貫家族式車頭設計，有啲似拉大咗嘅Cilo，襯上較高大嘅SUV身形，居然又有另一番味道。整架車畀人感覺有件頭，但不帶霸氣，頭尾燈用先扁後圓設計，如電眼般溫柔迷人，車尾不複雜迂迴，由頂至底稍稍收Hip，簡約線條卻內藏實際，事關Koleos如寶馬X5般，採用上下對開式揭背，好處係尾門變得較細，揭起時毋須太大空間，升起更不會太高，細粒人士要跳起關門咁𤓓爆，如斯溫柔體貼，簡直如萬般風情嘅法國女人，相當引人。
日韓體貼
外形充滿法式味道，內櫳卻帶有亞洲精緻感。甫坐上車已被密集式多功能中控台所吸引，唔怕佢掣多，堆埋喺一小角絕無問題，起碼整個駕駛艙仍然舒服簡潔，但又唔會過度閹割功能，加上有番雷諾傳統圓形冷氣風口，令走高科技觀感嘅銀黑內櫳，無咁冷冰冰，透番點活潑味道出嚟。最可惜係，歐美版附有嘅GPS連LCD被拿走，港版換上較簡單嘅電子鐘及溫度計。
日產技術支援，梗要一試操控同性能，試揸30分鐘，最先感受到扭力峯值個Range幾闊，轉數唔會因轉波而一下子跌晒落嚟，官方數字4,400rpm到最高值，但我試山上斜路，約3千多轉已嚟料，轉埋加減動力更澎湃，2.5L對一架SUV嚟講唔算太大，卻畀到如3.0L般推動力，抵讚。令我困惑嘅係斜路開車問題，由於手掣升級為電子式，慣常先關掉才畀油開車，但不像Q7、X5般會鎖車，若起步油門不大便會出現溜後，解決方法可用傳統HandBrake技巧。
規格表
引擎：2,488cc
馬力：170bhp/6,000rpm
扭力：226Nm/4,400rpm
傳動：6速CVT波箱，四驅
售價：$268,000
查詢：維信汽車（29273538）