本來想劈頭便寫「敏妮供滙控（005）」，但想深一層，敏妮嘅讀者或者唔多，但只要其中一個信咗敏妮，然後去供股，一旦滙控出咗乜嘢事，敏妮要賠上名聲固然事大，累讀者有損失就更罪無可恕。
當溝淡每股成本
不過，敏妮一開始寫呢個專欄，就已經公開月供滙控，中間雖有轉軚，但冇沽出所持滙控，因為敏妮而投資滙控嘅朋友，可能會對敏妮喺供股上冇立場而失望，所以敏妮仍然都係不能迴避。
首先敏妮要承認，冇喺高位沽滙控係一個錯嘅投資決定，即使可以為自己搵個藉口，話長揸滙控收息，但係啱係錯，自己最清楚，投資最忌係連自己都呃埋。就好似日前電視台訪問滙控亞太區前主席艾爾敦時，艾爾敦都承認當年投資滙豐融資有錯，錯在冇派員入去。家陣滙控陰亁滙融嘅做法，就係極力去彌補之前嘅錯誤，減少因為錯誤嘅投資造成嘅損失。
參與滙控供股，亦係敏妮為錯誤投資作補救嘅行動。由於敏妮月供滙控，一時間未計得出每股滙控嘅平均買入成本，但肯定比市價高，以大折讓供股，變相溝淡每股平均成本。
長揸收息暫不沽
另一個諗法係，28蚊供股價，以一眾投資銀行出嘅研究報告睇，即使係最差嘅目標價都有三十幾蚊，高過供股價，藉住坐緊艇嘅滙控股票，敏妮有權以28蚊買入滙控，即使呢頭收到供股嘅股票，嗰頭沽出，每股起碼賺幾蚊，一手起碼賺過千銀，幫補坐艇股票嘅損失。
敏妮不諱言，供股得返嚟嘅股票，會繼續持有用嚟收息，但唔係因為盲目支持滙控，係因為敏妮嘅投資組合唔只一隻股票，而滙控係屬於長線投資作收息用途，當然如果喺股價上有合理回報，又搵到另一隻更適合長揸收息嘅股票，敏妮唔排除沽滙控換馬。
供定唔供？大前提當然係你有冇錢供股。至於長揸定短炒？就要睇各人自己嘅投資組合。
溫敏妮
http://wanmanli.com/blogs/