華華噚日睇《華爾街日報》，有篇報道講美資大行美林嘅花紅，雖然前主席兼CEO塞恩08年冇花紅收，但美林10名最高薪員工，舊年合共領取2.09億美元（約16.3億港銀）報酬，高過之前一年嘅2.01億美元。華華睇到都打個突，咁嘅時勢仲有咁多花紅？
紐約嘅首席檢察官AndrewCuomo調查究竟發放花紅，事先有冇得到買咗美林嘅美國銀行同意先。美銀就話美林之前係獨立公司，薪酬自決喎。
報道又話，美林員工嘅薪酬係以現金加股票形式發放，至於高層主管嘅基本人工，通常喺20萬至75萬美元左右，08年薪酬主要嚟自股票花紅，不過舊年起，股票價值已大跌。
華華敢話，嗰班美林員工𠵱家最唔希望見到嘅，一定係手上股票好似滙控（005）咁，大跌之餘，仲要供股。