經濟唔好，人人都擔心被老細炒魷魚之際，特首煲呔全力創造職位，負責佢伙食嘅禮賓府廚師退休，煲呔隨即刊登招聘廣告請人，呢個名為二級家務員嘅特首御廚係公務員職位，月薪最少18,885蚊，頂薪21,880蚊，如果烹飪手勢了得，有機會晉升做一級家務員，每月人工高達25,000蚊！
應徵者要識《基本法》
做得禮賓府大廚，可以話係「香港第一鏟」，要求當然唔簡單，入職條件最少要有九年喺大戶人家或酒店西廚工作經驗，精通中、西菜式外，仲要曉煮東南亞菜，更要超時及不定時工作，除咗喺禮賓府煮食，亦要隨傳隨到去特首粉嶺別墅開工。
煲呔自詡政治家，請政治家廚亦有非一般要求，同其他考公務員職位人士一樣，應徵者面試時要接受《基本法》知識評核，八方提醒各位天才廚師、無敵廚神，想做好呢份工，唔好淨係識食，記得睇埋《基本法》。
中國人愛在飯桌談政治，因此政治家廚地位舉足輕重，尤其係煲呔政府倚賴政治化妝師整色整水，幫佢煮飯嘅廚師，識得恰到好處加鹽加醋相信係must，如果有幾味拿手菜更good，治大國如烹小鮮，搞到一鑊熟，隨時要承擔政治後果問責下台。
煲呔個經濟機遇委員會嘅成員最叻炒魷魚，御廚冇理由唔識，仲要技高一籌先見得人；佢又要求家廚要識煮東南亞菜式，唔知包唔包括港澳聞名嘅馬交閉門羮，可惜冇人知道如何炮製呢碗閉門羮，為香港人着想，八方認為煲呔應該要求澳門交出秘方，否則大家企晒喺度，真係不是味兒。現代人注重健康，政府鼓勵「三低一高」飲食原則，即係低糖、低脂、低鹽同高纖維，怪唔得財爺鬍鬚曾堅決拒絕派糖，原來都係為大家好。
特首當然要食得健康，同時配合政府唔派糖政策，八方要求御廚煮餸一律走甜，就算煮甜品都唔可以落糖，否則真係對唔住得唔到任何甜頭嘅市民；平日最好整多啲清清淡淡低脂菜式，收4,000蚊實習價低工資嘅畢業生，唔知幾時先有資格大魚大肉了。
mailto:[email protected]