沙巴或馬來西亞都有薄餅店，很多都由印度人開。我最鍾意食甜薄餅，拉成一大塊的餅皮灑上糖煎脆，圈成一個塔形，味道清新；又或打隻蛋落餅皮，煎熟後拍軟再蘸點咖喱吃。有些拉茶店、薄餅店都有體驗旅程，給大家親身學拉茶、fing薄餅。午後，見師傅有空，我手痕痕嚷着要試，希望做到最愛的甜薄餅（又名tissue）。昔日睇《美女廚房》已經見女生將餅飛到老遠處，這回我用手夾實打死唔放。我想溫柔地將麵餅托起，誰知剛拉起的麵餅已出現個大洞，可惜我左手已發力甩出去，繼續吧！一攤！薄餅拉長似一撮腸粉咁，大洞拉得更大，皺埋一撮撻落地板。師傅笑到彈開，忍住笑幫我將「薄餅」捲埋一撮攞去煎。圓薄餅做不到，順勢成了打埋一堆蘸咖喱食的桔餅。老細，你唔係打算攞去賣咁無良心呀！
記者：陳慧敏
