倒數卸任嘅澳門特首何厚鏵，可能人到無求搵嘢嚟做，對香港民主派寧枉無縱，就算只係同民主派行得埋嘅人士都封殺，港大法律學院院長陳文敏上星期去澳門都被拒入境，令人譁然。陳教授冇政黨背景，政治色彩淡薄，唔通澳門連香港大學學者都要禁止入境？如果係嘅話，下次會ban邊個呢？定係由鏵哥擲骰仔、轉輪盤決定？原來香港人去澳門碰運氣前，未入境就先要買一鋪大細，既然係咁，鏵哥不如開個外圍盤，畀港澳市民一齊賭鋪勁。
陰謀論：挫鏵哥頭馬
澳門點解咁忌香港民主派呢？難道怕佢哋影響大局？佢哋有呢個能力咩！？八方聽聞澳門政界近日流傳一個講法，指入境黑名單表面上針對香港民主派，實際上卻係衝着鏵哥而來！有人以國家副主席習近平舊年訪問澳門時，指示要「堅決反對外部勢力干預澳門事務」呢句話做令箭，上綱上線一刀切封殺民主派過江，目的係營造鏵哥專權、保守形象，令佢受輿論批評，民望受挫。
鏵哥近年民望不振，任期又夠鐘，何苦仲要對付佢？根據呢個陰謀論，成單嘢實情都係下任特首跑馬仔遊戲嘅配菜，所謂「入境黑名單」上數之不盡嘅香港民主派名字，通通係煙幕，頭號要嚴防入閘嘅，其實係鏵哥「頭馬」社會文化司司長崔世安！有人希望透過打擊鏵哥壓倒崔世安，最好令佢臨陣脫腳㖭。
又話澳門鏵哥話晒事，佢咁快就變跛腳鴨？呢個問題八方仍在探究，總之上述說法言之鑿鑿，信不信由你。事實上崔世安被狙擊有迹可尋，自從賭王月前公開撐佢後，就有風聲指崔家生意眾多，同何厚鏵家族好多合作，商界利益千絲萬縷，放出呢啲訊息所為何事，畫公仔唔使畫出腸啦。
小圈子提名噚日開始
金融海嘯令澳門賭業競爭進入你死我亡局面，各既得利益集團試圖左右大局只會增不會減。賭王有心水人選，其他賭場老闆都想拉頭馬，推選澳門特首嘅小圈子選委會選舉噚日開始提名，4月有結果，預計年中投票選特首，特首選戰殺到埋身，各路人馬最後機會押重注，買定離手喇喂！
mailto:[email protected]