港股急瀉，大笨象滙控（005）攤大手板問股東骨水，股價噚日跌穿50蚊，唔少散戶都想搵盞明燈照吓，睇吓股市幾時先至逃出熊市魔掌。噚日華華喺內地網站睇到篇報道，台灣歌手羅大佑自誇，每次推出唱片，股市都會由「綠」翻「紅」，即係由跌轉升，相信嚟緊佢同周華健、李宗盛、張震岳組成嘅「縱貫線Superband」樂隊推出唱片之時，就係股市回升之日。
特旺中港投資者
羅大佑講到自己咁巴閉，華華梗係要本住求真精神，睇吓呢盞「明燈」係堅定流啦。
羅大佑2000年打後，曾經出過5張唱片，華華搵番呢批唱片推出嘅日子，check吓之後一個月內，中、港、台三地股市嘅走勢，發現羅大佑所言非虛，三地股市都係升多跌少，當中以內地股市表現最凌厲，滬綜指一度最多升0.3%至7.2%（見表），唔通同佢轉戰內地市場有關？
好似03年4月1日，羅大佑推出唱片「無法盜版的青春」後一個月內，上海股市一度急升7.2%，而佢對上一張推出嘅「北京－香港演唱會」專輯，喺05年2月3日發行，當時滬綜指一個月內亦曾飆升5.6%。
羅大佑唔單止帶挈內地，都有益吓港股㗎，5張唱片一度令港股上升0.2%至7.5%，佢02年4月21日推出嘅「昨日遺書」，恒指一個月內就曾升7.5%。
唔多關照台灣鄉里
不過身為台灣人嘅佢，似乎冇乜點益到自己鄉里噃，好似02年嗰張唱片，推出後一個月內，台股一度急插近16%，都咪話唔邪。
李華華
mailto:[email protected]