經濟尋底，但搵食意欲依然高。荷包亁塘，用每一分每一毫當然想用得有價值。出外食飯，雖則明碼實價，但無話敢拍心口啱我胃口。聽日開始和幸推出「您想」午餐優惠，由人客憑良心話畀幾多就幾多。有筍嘢梗預埋《蘋果》讀者一份，睇睇佢哋覺得呢餐值幾錢。
記者：王震遠
攝影：陳盛臣
Model：Joyce@StageModel
「您想」價錢由你定
市道不景有眼見，好多食肆為求推動消費，紛紛推出1蚊優惠活動，可惜限制多多又一碟起兩碟止。1蚊一碟餸係好抵，不過始終唔及和幸（3月5日）新推出嘅「您想」午餐抵食。話明「您想」，價錢當然uptoyou，嘆完一set原價$88（須加一）嘅午餐，心目中覺得值幾錢就畀幾錢，覺得值0蚊當然可以一個仙都唔使畀，相反感覺物超所值，放低一百蚊都無任歡迎。負責人Joyce唔跟大隊推出$1優惠，全因覺得$1噱頭賺唔到錢，只會造成惡性循環，反而希望客人因應食物質素以及自己消費能力畀錢，而且有別其他餐廳只用一種食物做$1優惠，呢個lunchset由前菜到甜品足足有六個菜式。前菜先有鮮味嘅黑松露𩶘魚薄切同野菜沙律，再有自己燒嘅特上燒肉，包括有燒汁黑毛和牛肋骨、柚子伊達赤豚、麵豉雞腿肉。主菜過後仲有黑魚子茶碗蒸蛋、麵豉湯、白飯同每日兩選一口味雪糕。筍嘢當然有限，由3月5-27日12nn至3pm，每日限定名額100名，分12nn至1pm及1pm後兩個時段各50名，先到先得，想試試一於擔張凳仔霸定頭位啦。
讀者文小姐：值$68
「呢個餐都值$68，呢度都好靚，我好鍾意。和牛好好味，同出面食到嘅唔同，前菜最好轉一轉唔要沙律就最好，同日本嘢好似唔係好夾。呢個食量男士可接受，女士就真係多咗。」
讀者姚先生：值$50
「如果食埋碗飯，啲肉量就好似少咗啲。又有黑松露、又有黑魚子，收$88都係合理，都值嘅。但如果我一家四口嚟食會畀$200，即係每人$50。個燒牛肉我最鍾意食，我一定會帶埋個女再嚟食。」
「您想」午餐（原價$88）
特上燒肉盛皿
（a）柚子伊達赤豚：日本赤豚淋上以柚子、蘋果肉、忌廉和酒混成的柚子醬，入口沒半點膩，還帶點油香味。
（b）燒汁黑毛和牛肋骨：兩位讀者不約而同大讚，和牛肉油花分佈夠平均，經濃味燒汁淋過，牛味本身已夠重，燒過後還變得特別香。
（c）麵豉雞腿肉：日本的雞腿肉，淋上麵豉、洋葱、味醂等調味料。雞肉入口特別嫩滑，而且肉汁夠多，燒熟後仍不覺亁身。
黑松露𩶘魚薄切
選用法國的黑松露，配上日本𩶘魚薄切片。味道很夾，並帶出其鮮味。
黑魚子茶碗蒸蛋
很少日本料理會用黑魚子，而用黑魚子配合茶碗蒸蛋，口感嫩滑又帶點蛋香。
蠔王坐鎮$888二人餐
嫌「您想」午餐唔夠喉，和幸新推有另一個新套餐「生蠔和牛二人前」，不過就唔係自己定價。二人套餐$888，包括生蠔、和牛、海鮮，前菜同甜品。由𠵱家至4月底逢星期日至星期四6pm至11pm，仲請到蠔王JohnStewart駐場，表演平生絕技，喺15秒內極速開12隻蠔。今次蠔王就揀選8款特色生蠔，包括「蠔中勞斯萊斯」Gillardeau及Tsarskaya等。套餐還有兩款和牛做的菜式，有近江和牛刺身同和牛壺漬。主餐海囗幸盛皿內海鮮可即燒即食，仲有最啱食肉獸嘅厚切牛舌、柚子手羽先等燒肉材料，記得試埋鵝肝蒸蛋同牛乳奶凍。
新鮮生蠔三重奏
（生蠔特飲、新鮮生蠔、開胃酸汁生蠔）
由蠔王John親身主理，揀選了來自法國的Gillardeau、Tsarskaya和BlackPearl，品質有保證。
近江和牛刺身
選用近江A4和牛做刺身，因其牛味十足、油多而且肉質濃。油花分佈平均，入口即溶油香味重。
海囗幸盛皿
集合三種最新鮮海產，包括蠔、帆立貝、蟶子，帆立貝配上清酒和牛油，燒後香上加香，必試推介。
和幸日本燒肉料理（21174268）
銅鑼灣謝斐道496號金利文廣場3樓
