轆Book：<br>吉隆坡獨家直擊　歐陽若曦超班的士佬

轆Book：
吉隆坡獨家直擊　歐陽若曦超班的士佬

鄭中基講過畢生志願揸波子，其實難度唔高，坐過佢手車，先叫人羨慕。廠方喺馬來西亞搞咗個2009亞洲保時捷卡雷拉盃官方試車日，由波子王Darryl扮演的士佬玩TaxiRide，〈轆Book〉記者有幸坐喺隔籬，落Track陪跑30圈，兜圈兼超速，呢趟的士之旅絕對令我畢生難忘。

記者、攝影：梁美甜
鳴謝：PorscheAsiaPacific

先試：車手任Driver

PorscheCarreraCupAsia作為亞洲頂尖級數賽車比賽，參賽者個個都有番咁上下，2008年度總冠軍Darryl除兩度贏得冠軍之外，更喺2008年澳門賽車以無敵姿態勝出GT盃，今年再戰表示會玩埋歐洲賽事。今次到訪吉隆坡出席官方試車日，Darryl親身上陣進行TaxiRide。TaxiRide？唔通做的士司機？OfCourse……Not喇！只係大家試乘由Darryl駕馭嘅Porsche911GT3Cup跑車咁解啫。

■未做TaxiDriver之前，Darryl先行跑幾轉Warm-up一下先。

■Darryl好欣賞Carrera落場表現，轉波好順反應好，最重要係，有冷氣。

■以比賽狀態駕馭GT3Cup跑車，直路最高速時更達時速230公里。

超強G值

大家或許落過Track玩過吓賽車，我都玩過，不過快極有限，今次由波子王Darryl出手，速度快N倍，Darryl笑言：「我會好集中揸車，等大家可以真正感受落場時嘅速度感同壓迫感。」載多個人負載會唔會重咗，揸起嚟會唔會無咁得心應手？「會重少少，但分別唔係太大，不過煞車會早少少。」果然無吹水，但見佢大直路轟到時速230公里，得番幾十米都唔收油，仲要去6波，差不多入彎至拖波，急煞再全速出彎，瞬間爆發出強大G值，承受得住會覺得好正；否則，腎上腺素狂飆會好驚。

■幾位車手扮演的士大佬，帶住大家狂兜圈，玩其TaxiRide，真係過足癮。

■除Darryl外（中），馬清揚（左）同麥慶德（右）係B組業餘車手。

再試：示範起圍彈出

玩完GT3Cup跑車，Darryl換部全新09年式CarreraCoupe，配備七速PDK波箱加選配功能Launchcontrol，起步成百公里掟出去，即席示範何為先拔頭籌，爽到暈！街車有樣好，就係大汗Darryl讚不絕口嘅偉大發明──冷氣嘞！玩TaxiRide直路快到時速200公里，無冷氣？隨時緊張到標冷汗呀大佬！

■大會引見車手同所屬戰車，一字排開好有氣勢。

■無論顏色、花樣幾唔同，Coupe性能規格都係一樣。

三試：超跑SUV

除GT3Cup跑車同Carrera外，大會亦安排咗部Cayenne載大家TaxiRide一轉，乜車都好，都係一波走天涯，大大部SUVCayenne直路時速都達170公里，幾時都話，落Track揸車最安全最好玩，尤其有專業車手同你做柴可夫司機。

■Cayenne係Porsche旗下最暢銷車型。

熟男卡雷拉車手

同場出現熟男新面孔，就係香港業餘車手麥慶德，「舊年第一次玩賽車（澳門），今年就膽粗粗玩CarreraCup。」點解？「賽車係細個嘅夢想，𠵱家負擔得到咪玩吓！成績唔重要，最緊要唔好包尾就得嘞！」

■拉花串錯名，麥生唔嬲仲要幽多一默：好彩個姓啱啫！

■麥生都係第一次見佢部戰車，超搞笑。

■麥慶德部戰車係咪好熟口面？係，因為購自Marchy㗎嘛！

上海09　揭幕戰

09年賽事用車，依然係以977Carrera為藍本兼劃一規格嘅GT3Cup跑車，由EKSMotorsport負責維修保養。揭幕戰會喺四月上海國際賽車場舉行，7場賽事入面更有列入2009一級方程式中國大獎賽嘅比賽項目之一。

■競賽版以輕量化為主，例有四點式安全帶、防滾架。

■大大個進氣口，有利於引擎運作。

同場加Hot&Kart

Sexy到震嘅RacingQueen令現場熱辣辣，之後再嚟多個Kart車賽。薑真係越老越辣，年齡平均30歲嘅大家最終敗於50歲開外嘅馬拉前輩手下。

■馬拉RacingQueen原來一樣咁白淨。

■F1賽車場地之一嘅吉隆坡雪邦國際賽車場，俾大家試車最啱。

■呢堆Kart車揸到可以響胎兼勁甩尾。

■出發前，先有班賽車女郎出場任影，好有Racing味道。