八方早前講過，民建聯東區區議員黃建彬同鰂魚涌居民協會，月前合辦一項名為「青年郊外野戰軍事訓練」活動，包括要參加者模擬「進攻美國領事館」。有市民質疑民建聯喺「解放區」招兵買馬，高姿態針對美國領事館有問題，擔心激起盲目民族主義、挑起狂熱愛國情緒，影響社會安定，報警要求介入調查，警方接報後果然做嘢。
據八方了解，警方柴灣分區已開file，並將案件交由該區雜項調查小隊接手調查，至於如何調查則未有透露。據講按正常程序，警方應該會接觸主辦單位，或者參加者了解情況，即係話黃議員都可能要接受警方調查。佢係福建省南安市政協，又係東區滅罪會主席，如果因為「進攻美國領事館」而被盤問，都幾冇face。八方噚晚聯絡黃建彬，但佢冇回覆。
已向美方解釋
至於安排呢個野戰訓練活動嘅機構，網站已刪去「進攻美國領事館」字眼，改為「攻擊領事館」。雖則呢件事表面睇係笑料一則，但原來已驚動美方，民建聯要向對方解釋只是一場誤會，總之中、美人民友誼萬歲啦。