年初啱啱慶祝完90歲生日嘅東亞銀行（023），過去一年可謂多事之秋，銀行擠提兼盈利大插水，據聞短期內仲有高層離職，相信主席李國寶會相當頭痕。據賓架界傳聞，東亞財務總監Daniel尹焰強會喺今個月中，告別做咗廿年嘅東亞，轉到另一家上市地產公司做CFO（財務總監），於此失業裁員時勢，Daniel仲有工轉，認真犀利，證明乃做得之人也。
近期東亞管理層變動都幾大，執行董事兼副行政總裁彭玉榮將會喺股東大會後榮休；之前另一元老、執董陳棋昌亦已經喺07年退下火線，以顧問形式轉職到東亞（中國）做副主席，𠵱家連熟悉東亞盤數嘅Daniel都走埋，真係令人意外。之不過，有傳寶哥哥已經搵咗人頂佢個位，穩住大局。
講番Daniel，佢係行內出名嘅好好先生，04年南亞海嘯，佢同家人啱啱喺布吉蔻立Sofitel酒店度假，死裏逃生仲不忘救助其他人，可謂人生閱歷豐富。