政協會議今日揭幕，唔少身兼立法會議員嘅政協委員，噚日下午匆匆北上，預算下星期先返香港，民建聯主席譚耀宗開完議事規則委員會，處理埋社民連掃場單嘢就上飛機，趕住參加今日開幕禮，身為行會成員嘅鄉議局主席發叔亦然，同鄉議局副主席張學明一齊北上。
發叔此時上京真係好時機，因為公民黨湯家驊聽日會在立法會大會上，質詢政府點解委任被評十大表現最差議員入行會，當中有甚麼政治交易，應該從實招來，如果發叔喺香港，面對呢個場面都幾尷尬，逃不過當眾受靶之劫，都幾無癮。
曾鈺成都係政協，以前佢未做立會主席，可以專心開政協會議，今年卻要留喺香港主持會議，相信要遲幾日先上京，由於人大會議周四先開始，所以身兼人大嘅議員可以開埋個會先上京。