𡃁模Angelababy（楊穎）早前20歲生日獲偶像張栢芝拍video祝賀，激動到喊。Angelababy噚日喺海港城同熊黛林、汪圓圓一齊宣傳所屬模特兒公司Style搞嘅招募新模特兒比賽。
Angelababy澄清話自己仲未同Avex簽約，未成為濱崎步師妹。提到邦民女Kama話視佢為假想敵，Angelababy就話：「冇聽聞過，不過佢都幾可愛。」佢話自己就會視偶像張栢芝為發憤對象，栢芝之前寫日記記低淫照事件嘅心情，留畀囝囝大個睇，Angelababy力撐偶像話：「好有意思，如果我媽咪由我一歲開始寫日記畀我，我會好感動，我將來都會學佢嘅做法寫日記。」
陳碧舸難捨小小超
同場曾經同小小超李澤楷傳緋聞嘅模特兒陳碧舸（Bonnie），由於佢係體操選手出身，仲即場跳高擺甫士，佢話：「我都怕跌親同走光。」今日度過24歲生日嘅佢，有冇請埋李澤楷？佢就故作神秘話：「總之同好多朋友一齊啦，冇指定邊個。」Bonnie又話自己偶像係股神巴菲特，至於小小超？佢就話：「佢係朋友，唔係偶像。」
採訪：羅慧敏
攝影：林德雄
