鄺志堅過去幾年做立法會議員時，連同嫻姐以及王國興成日同煲呔開片，據聞煲呔視工聯會「煎釀三寶」為頂心杉，但最近鄺大狀終於獲煲呔解禁，被委任為臨時最低工資委員會三個勞方代表之一，同喺勞工界江湖地位極高嘅劉千石同李啓明平起平坐。
鄺大狀對被委任當然好開心，因為佢都好想搞得掂最低工資，造福打工仔，至於煲呔點解忽然解封，佢同八方講，唔知煲呔有乜盤算，但唔排除同佢已經卸任，冇乜機會同煲呔駁火有關，至於日後會唔會有更多公職加身，佢講笑話自己真係志不在此，佢留意到新財政年度中，勞福局預留咗筆錢請副局長，可能張建宗想搵個副手，佢坦言局長可以考慮吓佢，鄺大狀好幽默咁講，由於佢做過議員，要同議員周旋得心應手，做好呢份工冇難度也。