世紀金融海嘯後患無窮，最恐怖係冲壞高官個腦，財爺鬍鬚曾救市無方，救人乏力，被要求收4,000蚊實習價人工，按此原則，勞工處處長謝凌潔貞應該做義工先啱數。
當年都做過小文員
謝凌潔貞噚日接受商業電台訪問，講到好多中環財金精英𠵱家都冇得撈嘞，望天打卦好痛苦，佢苦口婆心咁勸喻呢啲收開高薪嘅白領人士，如果持續一段時間都搵唔到工，都要馬死落地行，轉行嘗試另類嘅嘢，可能都不無好處咁話。
香港人出名能屈能伸，呢啲嘢講真都唔使處長操心，不過佢仍然好肉緊，話自己雖然身為處長，但想當年都做過勞工處嘅助理小文員，喺前線見過唔少上有政策、下有對策嘅蠱惑嘢，由此可見做低微職位都不一定係壞事，又話基層工作同樣好重要。
講到自己好似由低捱起，其實處長只係暑期工做過幾個月小文員，畢業後佢就加入政府做AO政務官，從此平步青雲，攞住金飯碗，又點會明白失業人士徬徨心態？如果位高權重嘅處長今日被人炒魷，唔知佢會考慮轉職做邊一行呢？就做番個勞工處小文員好冇？