隔牆有耳--素心聲:供象待嫁 - 李八方

隔牆有耳--素心聲:供象待嫁 - 李八方

投資老手叫人唔好同股票談戀愛,更萬萬不能做人世,但人非草木,有幾多人做得到呢?大笨象係無數人愛股,好多人買入幾十年長揸,甚至世代相傳留畀子孫,因此大笨象噚日正式宣佈供股,好多香港人十分關心,究竟供唔供,仲揸唔揸,有排計數。

長揸大笨象幾十年

政界都有唔少大笨象忠心擁躉,民建聯蔡菜子係其一,佢媽媽幾十年前開始買入大笨象,多年來一直只收股唔收息,累積至今大約有100手,佢話之前5號仔個價去到92蚊時,曾提議母親沽貨套現,後來問過股票經紀,對方話既然蔡媽媽唔等錢使,又冇其他投資大計,一動不如一靜,後來大笨象一度衝上150蚊、160蚊一股,兩母女都自豪有眼光,可惜近月大笨象跌到真係阿媽都唔認得,蔡媽媽亦冇乜心機。
蔡媽媽唔捨得賣大笨象,唔知係咪想留低畀個女做嫁妝,八方忽發奇想,如果蔡菜子有份咁豐厚大陣象嘅嫁妝,唔知會唔會催旺佢桃花。揸住咁多大笨象,是否供股要諗清諗楚,有專家話可以沽出部份股份,先套現後供股,咁就唔使真金白銀攞錢出嚟,蔡菜子近日上京開人大會議,相信暫時冇乜時間同阿媽商量呢個問題。
蔡家母女都十分長情,阿媽長揸大笨象幾十年,做女嘅就同8號仔私定終生,蔡菜子都有唔少電盈股份,賬面蝕足八成,可以話係另類「愛情重傷」,本來電盈私有化,就可以同佢講拜拜,點知又波折重重,事到如今,迫於無奈要同8號仔纏綿下去。
白鴿黨李華明都係大笨象股民,不過只得一手,佢話喺120蚊入嘅,當時都係有閒錢貪得意買入,所以賺蝕都無關痛癢,就算供股都係幾千蚊,應該會供,佢自言投資眼光好水皮,所以一直甚少沾手股市,只做最穩陣投資。
醫學界議員梁家騮一度持有唔少大笨象,後來喺高位沽出套現同醫管局打官司,佢睇大笨象眼光咁準,八方早前同佢飯局時,請教大笨象前景,事關好多人都話係時候撈底,騮哥一貫慎言,只係話年底先啦,5號仔後市表現如何,相信佢心中有數。

mailto:[email protected]