Lunch叫你去食布甸，唔好噓我！此乃英國國民美食「約克郡布甸」，以招牌菜命名的YorkshirePudding絕對係今期SoHo區最hot的新餐廳，亦是全條街最抵食，午飯時間人山人海，連訂枱都要一星期前book定！
$68 逼爆新貴大堆頭
價錢平是YorkshirePudding旺場原因之一，setlunch主菜有三款揀，每日不同，燒牛肉、肉批、烤魚扒、意粉、咖喱輪流上場。先奉上一個cupsize的約克郡布甸，繼而頭盤可選餐湯或田園沙律，最後還有甜品。三道菜連飲品，價錢$88加一，二人同行每位$78，要計到最抵就要三人或以上同行，每位$68，真係要搵晒全公司一齊嚟。Lunch份量極大，像主菜連伴碟的薯茸、薯條、雜菜堆滿整隻碟，胃細細的OL一個人真的吃不消。
英國阿嫲的味道
質素好才是逼爆的主因，由新鮮材料打成的餐湯到香濃咖啡，都可感到用料的嚴謹和心思。菜式不花巧，是grannystyle的屋企feel英國菜，調味較輕手，可吃出食物的原味。大廚Alex是百分百香港人，曾在英國餐廳學藝多年，所以煮出地道風味，不少英國人weekend都鍾意訂一大盤約克郡布甸、拖肥布甸返屋企慢慢嘆。
YorkshirePudding
隨午餐附送的約克郡布甸，以雞蛋、牛油、麵粉焗成，熱辣辣入口鬆脆，像食空氣，淋上自家製的牛肉汁，味道濃郁。
（甜品）拖肥布甸
入口黏黏帶濃濃拖肥味，甜味適中，好食。
其他推介：查理斯忌廉燴雞
將燴雞肉和雜菜放進布甸內，入口creamy。$160
YorkshirePudding（25369968）
中環士丹頓街6號
新登場
$98 悠閒Jazz意菜
新開業不久的MrsJones位置方便，就在石板街盡頭，環境開揚，最啱lunchtime嚟放鬆吓。餐廳主打時尚的南意菜，店名源自BillyPaul的爵士名曲Me&MrsJones，餐廳逢周六晚現場Jazz表演都會奏起此曲。三道菜setlunch收$98加一，菜單每星期不同，頭盤可選餐湯或沙律，主菜可從魚、肉或意大利飯中三選一，連甜品一客。大廚來自新西蘭，對用料十分講究，堅持從意大利入口意粉及芝士等材料，價錢卻較同區食肆便宜，就算不是來吃setlunch，散叫點菜都不會肉痛。
（主菜）炭燒吞拿魚伴青豆
吞拿魚肉質鬆軟，味鮮而不腥，帶黑胡椒香，青豆又腍又入味，清清淡淡的很合OL口胃。
（湯）蘑菇湯伴脆麵包
以蘑菇打成的濃湯，滿口菇味，麵包都索盡蘑菇精華。
（主菜）露絲瑪莉烤香腸伴豆
香腸皮脆肉惹味，佐以陳醋和車厘茄，酸味可中和香腸的膩滯。
MrsJones（91236049）
中環雲咸街79號夏利里拉行地下
$100 即席睇靚仔煮tapas
Tapeo堪稱全城最正宗的tapasbar，店內不設餐枱，以bar圍住開放式廚房，廚師就在你面前即席煮，意籍經理話：「好多人特登嚟睇我哋班廚師煮食！」菜式主要以橄欖油、番茄、蒜頭調味，突出新鮮食材的原味。Setlunch（$100加一）包餐湯、甜品及自選tapas兩款（Jamon火腿除外），平日tapas已$48-$68，setlunch確實好抵。若不怕醉醉哋返工，可配一杯Sherry酒或紅酒，襯埋店內的西班牙音樂，一個鐘的lunchtime，身心都像飛了去西班牙。
（主菜）tapas
（前至後）辣椒八爪魚：從未吃過咁嫩咁軟咁甜的八爪魚！西班牙辣香腸伴番茄：風亁香腸有豬肉甘香。些利酒火腿煮蜆：火腿和蒜茸的香味都煮入蜆內，夠惹味。
（湯）西班牙番茄凍湯
每啖都是橄欖油和番茄的清新味道。
（甜品）聖地牙哥撻
以生果溫桲（Quince）作餡，味道似蘋果又似梨。
Tapeo:BarDeTapasyVino（31711989）
中環荷李活道15-19號
