張愛玲筆下的女主角，往往都是感情錯亂壓抑甚深，《傾城之戀》的白流蘇、《金鎖記》的曹七巧都逃不過苦戀的掙扎。現實中，飾演七巧的焦媛又何嘗不是為愛受盡非議側目？十七年忘年戀之始，與男友高志森受盡指點，何嘗不是相愛很難？戲如人生，人生如戲也許正是如此吧。
記者：蒙為亮
攝影：陳陶鈞
場地：上環文娛中心
高志森
擅製作喜劇，代表作有《開心鬼》、《富貴逼人》和《家有囍事》系列，更憑自己執導的《南海十三郎》獲得第三十四屆金馬獎最佳剪輯獎及最佳導演獎提名。九十年代開始，他轉攻舞台劇，最膾炙人口的舞台劇是《我和春天有個約會》，現為青春舞台劇團的執行總監。
焦媛
香港演藝學院戲劇學院畢業生，曾兩奪校內傑出女演員獎，以《少女夢》、《蝴蝶春情》兩獲香港舞台劇獎提名最佳女主角。06年憑《誘心人》Alice一角榮獲香港舞台劇獎最佳女配角；08年曾三度演出《陰道獨白》及原創音樂劇《心太野》及《白毛女》等。
高志森=高 焦媛=焦 記者=記
三重身份尷尬分裂！
常聽見做人男友甚艱難，其實要做，不難，做得好才是學問。面對焦媛，高志森一人分飾三角，情人、老闆、朋友，自言身份確實重叠了，尷尬情況亦當然有，不過對他與焦媛的影響不算大，苦了的，只是身邊人而已。
高：由相識到真正拍拖，真係有好多身份上嘅調節。離婚前，我只係一個老公、一個老闆同一個老竇，咁已經很辛苦；𠵱家對住佢，又係前老闆、情人同好友，撈埋晒一齊，真係好難處理。不過咁，我承受嘅壓力都唔夠身邊嘅同事大，尤其起初頭幾年，同一個劇社，我開新劇時，啲寫手又唔知使唔使預焦媛一份，如果要預，又唔知係唔係要佢做女主角。你知啦，當時間公司又唔係得我一個，仲有其他投資者，嗰時搵焦媛做戲真係好尷尬，一方面覺得個角色好適合你，不過由我開口又比較為難，我可以當住大家講，其實當時選角，真係無放太多私人感情，無偏心。
焦：我都仲記得當時嗰啲人嘅目光，外界好質疑我，諗起都覺得好難受。
高：到後來，焦媛有自己嘅獨立劇場，情況好好多咯，少咗種尷尬，大家將焦點放番落佢嘅演技度。
焦：我當時惟有不斷努力做更好成績，我付出好多，由朝練戲練到晚，為咗嘅都係觀眾嘅認同。
高：當年，我同杜國威喺演藝學院揀焦媛，都係因為佢跳得演得同勤力，𠵱家好少學生做得到，況且𠵱家好嗰班舞台劇演員，都會半途出家拍戲，唉，我唔係話唔鼓勵，不過唔應該盲目接拍囉。
焦：哈哈，我就無諗過拍戲，目前只會專注舞台劇演出，踏上舞台，我仲有好多空間可以突破，就好似今次《金鎖記》，我仲有大把發揮空間。
高：如果有好劇本或者好角色，你又會唔會唔接拍呢？
焦：有幾好先？咁真係要睇睇喇，不過如果係你開戲，我就一定唔接啦，哈哈……
許鞍華=張愛玲！
「Flirt」一字解「調情」，放在《金鎖記》的男女關係上非常貼切，故事大概講述焦媛為攀附權貴嫁入豪門，豈料自己的老公二爺竟是個半身不遂的人，而她就移情到三爺身上，在昔日的封建社會，這段關係簡直亂倫，卻愛得明刀明槍。
焦：《金鎖記》係個想表達好多矛盾面嘅故事，我好鍾意呢股倫理、家族同戀情角力形成嘅張力，所以揀呢個劇目演出。由細到大，我都好鍾意睇張愛玲同亦舒啲小說，當年家姐睇乜我就睇乜，不過當年完全睇唔明，只係覺得好文藝所以Keep住睇；上年放假喺屋企翻睇番啲小說，好感動！咁啱上海話劇團嘅王安憶有《金鎖記》嘅改編劇本，我非常想將成個劇搬返香港做。
高：我知，你仲叫我幫你打兩個電話嘛，一個係打畀許鞍華，一個打畀尹子維。
焦：無錯，一諗起張愛玲小說改編，我即刻諗起許鞍華三個字，因為佢執導過唔少改編張愛玲小說嘅電影，好似《傾城之戀》同《半生緣》……喺我心目中，阿Ann同張愛玲幾乎畫上等號，唔搵佢，我都唔知搵邊個。
高：阿Ann始終拍開電影，第一次做舞台劇導演，得唔得呢？
焦：我反而覺得非常好，平時做舞台劇，大家花好多時間對稿，阿Ann更在意演員嘅排練。因為佢、我同尹子維開始產生默契，阿Ann在意嘅不單止係演技，而係成個感覺，好有電影Mood。
記：高生，你好似乜都唔知咁嘅？
高：係喎，成個Project我只係幫手打咗兩個電話，綵排都未睇過，曾經有心血來潮想去睇睇嘅，點知俾阿Ann挖苦我話：「你嚟做乜？睇我？我唔係咁好睇喎！」
焦：哈哈……
結婚？咪搞！
感情無分對錯勝負，有的只是長相廝守或是忍痛分手，高志森離過婚，對一紙婚書態度依然無變，男方願意負上這個再婚重任，豈料焦媛大派檸檬反叫：「嘩！最好唔好咁快住。」
記：其實你哋都拍咁耐拖，有無諗過結婚？
高：結婚？有呀，不過唔會咁快，唔係因為未到呢個地步，而係時間未許可，兩個人可以一齊、真心鍾意對方已經係種福氣。我離過婚，更加知道婚姻嘅重要性，我唔想個婚禮好似《家有囍事》個Ending咁，三扒兩撥就草草了事，再結婚，唔可以當Show做，我要嘅係Honeyyear，唔係Honeyweek，最想去環遊世界，所以一定要有時間停落嚟先OK。
焦：嘩，咁咪要用好耐時間？好似鄉下人擺流水席一樣。不過講真，對於我嚟講，結唔結婚都無乜所謂。
高：大鑊，表錯情㖭……
焦：哈哈，我仲後生，有好多嘢未做㗎，要休息成年去結婚，真係唔好搞我。唔係唔想結婚，但如果太花時間結婚會弄巧成拙，遲幾年先算啦。
高：咁都好，反正我決定用一年辦Weddingparty。
焦：同埋我覺得演員唔應該太幸福，可能你會覺得我有少少自虐，因為太幸福會扼殺創作靈感，我諗做過演員嘅人一定明我講乜。一路以嚟我都算係唔錯，有機會Job接Job，呢行手停口停，多得好多朋友同觀眾支持，身邊班工作人員又好合作。
高：講到底都係要我等你啦？
焦：唔等得咪算囉，哈哈，我諗住四十歲會由演員轉做電影導演，完埋呢個心願先諗結婚都未遲。
高：死，睇嚟今次真係有排等。
後記
談婚論嫁本是兩個人的事，想不到是次訪問，高志森和焦媛竟會當着我面談婚論嫁！整個訪問過程中，他倆沒拖手，沒打情罵俏，沒刻意地在鏡頭前表現甜蜜，換來的，卻是老夫老妻式的親暱和互相鬥嘴。我想，愛情其實可以很簡單，太多莫名其妙的包袱、顧慮世俗的枷鎖，才會令相愛變得很難。老土一句，珍惜眼前人才是最重要。
聽講座了解原著
焦媛自小鍾愛張愛玲小說，對她生平也有一定認識，所以她和編劇王安憶在《金鎖記》演出之前，舉行一個名為《張愛玲兩面體》的講座，希望觀眾在看舞台劇前，可對張愛玲作品有更深體會。
日期：3月14日
時間：3:00pm
地點：上環文娛中心演講廳
費用：全免
《金鎖記》劇情簡介
曹家為攀附權貴，把曹七巧（焦媛飾）嫁進豪門姜家，可惜，嫁的是癱瘓在床的姜二爺，七巧卻鍾情三爺季澤（尹子維飾），不甘心的她活在豪門而遭受生活上種種壓抑，人格變得扭曲，斷送愛情的痛苦漸變成沉重金鎖，在高第豪門裏，鎖住一代又一代，任何人也掙脫不了……
演出日期及時間：4月2-5日8:15pm、5:00pm（4月4日）、2:15pm（4月5日）
地點：上環文娛中心劇院
票價：$160、$250
查詢：27349009
