張大教授寫大塊文章，好少好少講到本港上市公司，點知佢一連兩篇提及電盈私有化，大編輯打電話嚟話：「喂，睇大教授文章學嘢呀。」於是捧讀再三，OK啦，金融界人士好多都持有相同觀點，只係某一啲人對有關法則唔熟（或者為咗個人情緒而扮唔識），所以猛咁影射有人「種票」，甚至「買票」而已。以前王岸然講過，𠵱家張大教授亦講，有關人士（即李察那方）不能種票；外間的「無關」人士怎樣種法律管不着。
「壹仔」今期以八號仔私有化為封面故事，記者非常非常勤力，在澳門香港分頭搵資料，揭露好多人趁電盈私有化而搵到錢，包括一啲大戶在內。以張大教授嘅觀點睇，呢大批人有可能「種票」，但「壹仔」嘅報導完全冇提出任何例證講到呢班人與「李察那方」有關，頂多只係捕風捉影地「影射」而已。如果證監會亦有做相同嘅工作，掌握更多資料，有證有據嘅話，最好在三月二十四日向法庭提出。以「壹仔」嘅資料睇，原來市場效率論（marketefficiencytheory）係有一定效應嘅，即私有化價格與市價有較大差距時，市場上立即有人掃貨做套戥，套戥過程自不然包括將股票轉名取得股東特別大會嘅投票權，在此過程中，既然有聰明人識得買十股分拆成五票去反對私有化，你估啲大戶買股，會唔會識得運用同樣嘅手法去贊成私有化呢？
「壹仔」提到一位林孝文醫生嘅太太係莊月華，是李察的姨母；林孝文呢個名好熟，好似以前在馬圈好有名，於是打電話搵馬場活字典馬主N問吓，馬主N話：「林孝文咪係『智多寶』馬主囉，呢隻馬曾經偷雞贏過馬王『翠河』，震動馬場，於是當年個個馬主都識得林孝文。」係噃，醒起嘞，嗰年林孝文行運到極，連在年尾（十二月三十一日）嘅醫生/牙醫除夕晚會中，佢只買一張獎券，就中咗大獎，駛走一架新車，嗰晚有千幾人參加晚會，左丁山應馬主梁之邀，亦有在場，對林孝文之運氣寫個服字，但自此之後，就好少好少見到佢在馬場拉頭馬嘞！至於佢係唔係李察姨丈呢，大編輯話：「要講英文過去式，was！佢同莊女士離婚好耐嘞！」