上周五、六全日都聽到拍檔牛兄把聲，係咁同我哋啲戰友講「媽媽好」、「媽媽好」。初時都覺得聽到有啲煩，不過佢醒呀，命中馬瑟韋爾（Motherwell）呢口平手盤，總算喺嘈吵聲中贏到錢，令〈早飛倉〉止跌。
周二由我畢傑推介，呢個周中盃賽當道，梗要搵啲贏面高嘅球隊做重心；我揀咗周三德國盃8強賽事，拜仁慕尼黑作客照𡁻利華古遜，讓平/半都撐！
利華古遜歇冬後跌watt
假如係季初，我都會博吓利華古遜呢口下盤，事關佢哋當時個勢好勁，射手希美斯點㩒都㩒唔住係咁入波；直到歇冬後，呢班波明顯跌watt。好似聯賽主場對住史特加同漢堡都要全失3分，啱啱上周六連對漢諾威亦要輸埋，就知同季初相比差好遠。我唔會懷疑利華古遜會喺德盃排弱陣，相信希美斯、連拿度奧古士圖同卡斯特羅等主力會全部上陣，但同拜仁比仲差幾皮，況且後防要員文奴費特列治仍要養傷。
拜仁今季要征戰歐聯、德甲同德盃，可謂戰線繁多，但由奇連士文領軍之下，每場都唔會遣弱陣。睇番拜仁喺德盃嘅人腳，列貝利、東尼、高路斯、舒韋恩史迪加同薛羅拔圖等常規正選都會披甲，好似上圈就以5:1作客擊敗史特加，夠晒誠意。
配腳揀利斯菲
拜仁上場打多雲達不來梅一個，都只能夠賽和0:0累人，今次應該可以帶挈番捧場客。唔好忘記，德盃8強係打一場過嘅，肯定唔會留力之下，博拜仁90分鐘搞掂利華。配腳玩吓南美自由盃，喺巴甲情意結底下，梗係揀利斯菲體育會主場贏波，對手係上屆冠軍利加大學都未驚過。文：畢傑
早飛王貼士
星期三7利華古遜vs拜仁慕尼黑
首選：拜仁慕尼黑（上）（1.8）
次選：利華古遜大（1.65）
冷選：拜仁慕尼黑勝3:1（17）
早飛倉
主菜：星期三7拜仁慕尼黑（上）（1.8）@1,200
渾水摸魚過關：星期三7利華古遜大（1.65）x星期三28利斯菲體育會勝（1.55）2x1@300
今日早餐價錢：-$1,500
上日賺蝕：$590
早飛倉結餘：$80,654
規則：$100,000本錢，每日買早報最多動用$5,000，最少$1,000，逢周二、五見報。
周中焦點
星期三8 曼城vs阿士東維拉
英超周中開快車，記得維拉揭幕戰就喺主場4:2擊敗曼城，當時艾邦拉荷更連中三元。今次輪到曼城有主場之利，他們近6次迎擊維拉得5勝1負，報仇戰周三展開。
星期三25 馬略卡vs巴塞隆拿
西盃4強次回合賽事，近期陷小低潮的巴塞能否重響勝鼓？另一焦點將是伊度奧會否倒戈上陣。巴塞對上6次西甲到訪馬略卡錄得全勝，而首回合亦主場勝2:0。