曼聯門將賓科士打前晚英聯盃決賽做英雄，撲出12碼助球隊贏得今季第2個獎盃，前途突然一片光明。不過呢位英雄背後仲有兩個無名英雄，分別係iPod同門將教練史迪利（EricSteele）。
賓科士打同求大俠講，雙方互射12碼前，史迪利遞個iPod畀佢睇，入邊全部係熱刺球員嘅射12碼畫面：「佢同我講奧哈拉會射左邊，結果果然係左邊！」唔怪得前晚見到雲達沙、賓科士打同史迪利雞啄唔斷，仲以為臨急抱佛腳，原來係臨場睇iPod，真犀利！
門將教練臨場睇片教路
曼聯領隊費Sir賽後激讚賓科士打，「冇佢我哋贏唔到冠軍！佢將成為未來英格蘭國家隊嘅正選，我只係希望傷病可以離佢遠啲。」呢場波英格蘭國家隊領隊卡比路亦有到場，今仗MVP得主賓科士打嘅表現肯定攞晒分，相信好快可以繼06年後再為國家隊披甲！
25歲嘅賓科士打呢鋪真係一Pod翻身。話說佢05年由史篤城加盟傷病不斷，加上雲達沙越老越穩健，總共只係替曼聯出過7場咁大把（不計外借屈福特），目前合約更剩餘最後一年。好彩傳來陣陣魷魚香之際，呢場英聯盃決賽救佢一命！費Sir都繼續讚話：「一個從傷病中振作嘅球員，肯定特別硬淨！」
賓科士打固然夠勤奮，不過舊年加盟嘅門將教練史迪利，同樣居功至偉，因為就係佢率先將iPod結合足球。不過，前英格蘭球證普爾就話，呢種做法可能係走國際球例嘅法律隙，英足總遲啲會同國際足協討論，搞清楚球員係咪可以用iPod作分析。
伍健：比賽睇iPod違規
我求大俠請教過前香港裁判小組主委伍健，佢話若比賽期間睇iPod肯定違規。不過，加時賽後至互射12碼呢段期間，又算唔算比賽緊呢？球例等專家去討論，球員做足功課自然有着數，愉園門將范俊業都話07年足總盃決賽，靠記憶撲出南華前鋒T史高斯嘅12碼；呢個世界勤力永遠係最佳武器！