國際金價最近止跌回升，黃金交易商當然要乘機宣傳吓，好似前身叫福而偉金號、有近17年歷史嘅「第一金」，噚日就大鑼大鼓搞咗個開業酒會，仲搵到立法會金融服務界議員詹培忠同埋金銀業貿易場行政總裁盧琪昌剪綵，夠晒面子。
第一金CEO蘇裕斌Sammy預言，金價6月份會飆至每盎斯1200美金高位，佢哋未來兩三個月會將經紀團隊由二十多人，增加3倍至100人，逆市創造職位，當然值得鼓勵。
唔講唔知，第一金母公司福而偉集團，原來同太平洋島國、澳洲東部嘅薩摩亞（Samoa）好有淵源，95年就喺當地成立咗一間專做亞太客戶離岸業務嘅第一亞洲商人銀行。