上個禮拜,華華同敦沛金融投資研究部主管郭家耀,入跑馬地馬場觀賽。去到尾聲,當華華嘆緊「白果粥」,忍唔住講咗句:「馬好難賭!」郭生笑住話:「雖然個個都咁講,不過呢排真係難賭咗。」華華追問點解,佢答話呢排跑馬地出現黑天鵝,外檔出閘嘅馬,頻頻勝出。大家要知道,跑馬地馬場嘅跑道彎急、路窄,排外檔非常蝕底。
為做分析爬入馬場
郭生話:「市場湧現唔少解釋,甚至有人話網上流傳有段短片,影到每逢禮拜三,跑道內檔不斷有灑水活動。內檔濕𣲷𣲷,外檔反而有着數。不過全部都係傳言,聽吓好喇。」佢補充話:「你唔發覺呢排無端端多咗人爬入馬場,行入跑道咩?其實佢哋唔係白撞,佢哋一向依賴數據分析,不過突然發覺個分析model失靈,所以即刻做sitevisit去睇點解。」
華華:「咁盡責?個啲亂出AAA信貸評級嘅分析員真係要學吓。」郭生:「係呀!呢啲咪係專業、有心機嘅分析員。」
不過可能因呢個「外檔黑天鵝」嘅影響,散場時華華同郭家耀都係風吹雞蛋殼,財散人安樂!