周末，股神畢菲特話事嘅巴郡，出咗萬眾期待嘅年報同股神寫畀股東封信。喺1974年美股跌落谷底時，股神憑一句「我簡直好似個走咗入妓寨嘅鹹濕仔一樣」，形容佢對買股嘅睇法。華華當然想知35年後，究竟佢老人家是否文風仍在。
致股東的信金句多
華華睇完整封信，股神完全冇令我失望！封22頁紙嘅股東信，金句多多。華華喺度轉述啲同大家分享吓。
首先，講美國嘅萬億救市方案時，股神就話「呢鋪政府晒冷」。唔知啲美國人點諗，我哋就明言下之意──即係呢鋪輸咗嘅話，就冇籌碼再嚟過。
講到旗下嘅廉價汽車保險公司GEICO，因為經濟差、生意多咗，所以有意喺對手捱打時做收購。佢仲自認係一隻「天體營中嘅飛蚊，目標多多又多汁肥美。」
講到好多管理不善嘅銀行被政府入股打救之後，帶來嘅後遺症係好似巴郡旗下嘅Clayton咁，管得好唔使救，但反而借錢貴好多。股神直言：「今時今日，做個有政府保證嘅癱人，好過做個冇政府保證嘅泰山。」
讚比亞迪好正
股神可能知道有雷曼迷債呢家嘢，所以又忠告：「想避開因對賭單位出事，而害咗自己，就要好似避性病一樣。淨係留意你同邊個搞都唔夠，一定係睇埋佢哋同邊個瞓。」
不過，我諗有啲香港股民，反而最鍾情呢句睇落非常普通嘅說話：「比亞迪（1211），一間好正嘅中國公司……」
畢菲特金句
‧「呢鋪政府晒冷。」
‧「天體營中嘅飛蚊，目標多多又多汁肥美。」
‧「今時今日，做個有政府保證嘅癱人，好過做個冇政府保證嘅泰山。」
‧「想避開因對賭單位出事，而害咗自己，就要好似避性病一樣。淨係留意你同邊個搞都唔夠，一定係睇埋佢哋同邊個瞓。」
李華華
mailto:[email protected]