轆Book：<br>JohnLee：三度患癌撐9年<br>唔捨得啲車

轆Book：
JohnLee：三度患癌撐9年
唔捨得啲車

一個人對某事物迷戀起上嚟，可以令人目瞪口呆。JohnLee收藏古董車超過30年，車場擺咗128架足令以全球古董車迷流晒口水嘅珍品；00年首次驗出甲狀腺生癌，醫生斷定得3年命，之後相繼驗出前列腺同大腸同樣患癌，撐到09年依然龍精虎猛通山跑，JohnLee戚戚然同我講：「我唔捨得啲車呀！」

記者：徐影龍
攝影：伍慶泉

BugattiType35

呢架極品就係Bugatti賽車，Type35代表廠方第35款型號，JohnLee話頭冚銻片屈番圓，又要攞去工廠壓排氣口，最花錢同難搞。

■軚盤、錶板、擋風玻璃全部原廠，搵得好辛苦。

■當年Bugatti賽車個手掣擺喺車出面，幾型呀。

古董車做堆填

相信年輕一代對JohnLee李松光無乜認識，就算同你講二十幾年前，佢拍住黃霑、王司馬搞廣告公司，經典作有腌尖大少盧大偉熨銀紙，仲有細細粒容易食嘅白鳳丸，大家可能仍無乜印象。不過佢喺古董車界就好出名，唔只懷舊車展必定邀佢出席，連向華勝拍《跛豪》、王家衞拍《2046》都要同佢借車，全因JohnLee收藏咗大量極罕有嘅古董車，由六十年代Audi80、AstonMartin第一部DBS，到BugattiType35呢類「只應書上有」嘅珍品，全部都俾JohnLee翻新過，令我有幸親眼目睹呢啲車中極品。
採訪當日踩入上水新田，迂迴曲折深入JohnLee古董車場，放眼四望都係爛鐵，根本同劏車場無分別，JohnLee自嘲話係汽車墳墓，我就笑唔出，一架似樣啲嘅車都無，份稿點交差呀？原來有五成車如廢鐵般周圍叠，有三成更埋咗落深坑度，連腳下踩緊嘅地，都係用十幾架古董車堆填出嚟，「我無位擺啲車，又唔想賣畀人，惟有見位就攝落去，手痕想整邊架咪吊番上嚟囉。」

■大部份古董車都溶溶爛爛，JohnLee將佢哋攝晒落坑度。

■MGB外觀翻新快完成，只差內櫳未搵齊件。

■呢幅平地係堆填出嚟，下面埋咗十幾架古董車。

死都要架車陪葬

JohnLee玩車超過30年，初期鍾情Lancia（領先），中期轉玩Ford，到家陣最愛甲蟲，因為易整兼易搵件。佢一邊帶住我哋行，隻手不停猛指，話畀我哋聽「呢嚿鐵」係71年油渣Benz跑、嗰「半截」係AlfaRomeo、俾啲草遮住晒嘅係開篷雪鐵龍，仲有側邊呢堆引擎……型號、年份全部清清楚楚，心中有數，同一味收集街邊垃圾嘅公屋阿伯，完全兩回事。
「我個場成人俾人偷嘢，試過成架Benz280CE拖走咗，我知係熟人做，不過唔會搞大佢，最多報警備案，費事佢攞去打劫我要上身。」咦，呢個係咪Gag嚟？
走入另一邊車場，情況360度轉變，擺咗十幾架JohnLee親手翻新嘅古董車，有番晒眼耳口鼻執到靚靚仔仔，有幾架一望就知仲大過我老竇。直覺上JohnLee今日着到身光頸靚，主要係為影相，不過一埋到「囝囝」身邊，捐窿捐罅、撥草揭車冚，完全唔怕污糟兼大塵，「我記性好，每一架整好嘅車都需要定時續牌，我又同啲囝囡講，到死嗰日都要架車陪葬，甚至將個骨灰盅就咁擺喺司機位就得。」整個訪問JohnLee講得輕鬆自在，唔知點解，我個心酸得好緊要。

■車場隔籬為起居室，相當整齊骨子，一拎起古董車書，JohnLee又講到收唔到掣。

■上次甲蟲車展就係揸呢架出席，最自豪係架車一撻即着。

■喺《2046》出現過嘅Benz的士，JohnLee話拍完之後已經唔行得。

■傳聞話第一代甲蟲個尾似希特拉，尾窗為眼，尾冚似顴骨，黑色就係鬍鬚。

■JohnLee指定做棺材車嘅老爺Benz，希望死前能修好。