37歲的梁漢文（梁炳）兩個月前拉埋天窗，直認恨40歲前做老竇的他，早前更被踢爆搵「九天玄女」求子，近日梁太Karen又的確疑似懷孕。上周梁炳夫婦齊現身尖沙嘴揀BB玩具及用品，Karen穿鬆身衫遮肚，腳踏平底boots，獲老公細心攙扶，令梁炳牛年添丁之說甚囂塵上。
新婚燕爾的梁漢文曾聲稱要盡快造人，其一是償父母抱孫仔的心願，其次是梁太林文慧（Karen）已年屆35歲，若生BB屬高齡產婦，難怪梁炳心急做人老竇。為求一擊即中，早前他更親自去「九天玄女堪輿學會」向高人問津求子，恨生仔恨到流口水。
婚後的梁炳積極造人，上周四他與太太到尖沙嘴海運大廈逛BB店舖，兩公婆睇個不亦樂乎，令Karen有孕的傳言更添可信性，當時她身穿遮肚的寬鬆長tee襯平底boots，梁炳則戴大墨鏡及冷帽，兩人在幾間BB用品商店不停穿梭，其後走進專賣西班牙貨的BB及兒童玩具店Itslmagical，Karen對BB玩具甚有興趣，不時指手畫腳，在旁的梁炳細心攙扶，又低頭細聽老婆意見。
續約搵奶粉錢
不過梁炳夫婦齋睇冇幫襯，步出商店時遇上記者即急步離開，此時有保安趨前問梁炳是否不欲上鏡，梁炳聽罷更加快腳步鬆人，與太太行到離行離列，對鏡頭非常避忌。
其實梁炳婚後已為生兒育女作準備，先減少煙酒，又勤做運動keepfit，他稱希望40歲前造人成功，因他不想與兒女年齡相距太遠有代溝。梁炳隨時於牛年做老竇，當然要未雨綢繆搵定奶粉錢，早前他約滿經理人公司金牌大風，據悉近日正洽談續約，料動筆成數極高。
對於Karen傳大肚，梁炳昨透過經理人公司發言人陳小姐說：「唔係，嗰日我哋行吓街啫，Karen不嬲有啲童真，佢去睇吓啲細路仔嘢，生BB就順其自然啦。」
採訪、攝影：娛樂突發組