民建聯一班人大、政協上京出席兩會前夕，噚日先開記招，講吓今年有乜高見獻畀中央。當中由主席譚耀宗提出，全民禁食一切野味嘅建議，本來可以令我哋祖國進一步同國際接軌，唔使成日俾啲洋人動物組織代表嘅外國勢力說三道四，話中國人野蠻唔文明，點知個建議未必惠及貓狗。大家都知，喺中國國情下，貓狗唔止係寵物，更係食物，咁都唔包，真係騎呢。
保護動物唔包貓狗
譚耀宗話，現時內地法律只保護野生動物，但「實驗動物」、「表演動物」、「展覽動物」、「競技動物」同埋寵物，內地都冇法律保護，所以佢建議內地整條《保護動物法》，禁止國民食野味。不過，當被問到條例會唔會包埋禁食貓狗時，譚耀宗就話只係建議禁食野生動物，貓狗唔算野生，所以「冇強烈話唔好」喎。
咁都未夠騎呢。民記另一政協曹王敏賢博士話，保持家庭和諧好重要，所以佢認為，香港應該同內地互認跨境離婚判決，即係珠三角地區法庭嘅離婚判決，可以喺香港執行。不過，到佢黨友葉國謙講到內地司法制度時，就即指現時內地法院嘅訴訟費要上繳中央，平日法院經營費就由地區政府負責，但偏偏好多訴訟都同地區政府有關。雖然葉國謙全程都絕口不提原本印喺新聞稿上「司法腐敗」四隻大字，但咁講法，佢黨友又建議香港執行內地嘅離婚判決，係咪有啲自相矛盾呢？
推動環保只說不做
主打環保嘅蔡菜子，噚日就建議內地政府採購綠色紙張，又話內地領導人好環保，卡片都用晒再生紙，但問到民記係咪一樣咁環保，卡片改用再生紙印刷時，蔡菜子就話：「唔係compulsory（強制性）嘅」。呢啲咪有口話人冇口話自己囉。
那邊廂，自由黨田少同莎姐亦會上京，噚日都特登開記招介紹吓佢哋嘅建議。身兼旅發局主席嘅田少建議中央開放更多自由行，做過電視嘅莎姐就關注到兩地創意產業交流，相對民記嗰啲嚟講，呢啲建議算係比較正常。
mailto:[email protected]