終於都到咗令敏妮手心冒汗嘅日子，相信好多滙控（005）擁躉都會同敏妮一樣，好期待佢交出一份令人滿意嘅成績表，繼續派息，因為只要有息派，就證明滙控仍然穩陣。
滙控擁躉無懼供股
前幾日，睇電視新聞訪問咗東尼，佢亦係滙控擁躉，唔信滙控需要供股集資。記者問佢如果滙控真係供股，佢會點，東尼嘅答案係，如果供股價平的話，佢會供；如果供股價貴的話，佢會沽咗手上嘅滙控。
大家唔好以為，佢因為失望所以放棄，始終供股價會較市價有一定折讓，東尼其實係諗住沽咗部份手上嘅滙控套現，用嚟供滙豐。即係話佢點都會供股。
雖然啱啱過咗嘅周末，傳出滙控供股，但既然執筆嘅時候仲未知滙控成績，所以講過另一話題。周末同個喺美國退休返嚟香港長住嘅uncle食飯，聽佢講當年讀書嘅嘢，提醒咗敏妮，其實好多嘢唔可以淨係靠勤力。
Uncle數口好精，佢話：「敏妮，我細細個心算已經快過人㩒計數機，你知唔知點解？其實最重要係要識變通，搵條捷徑，就好似計99乘99咁，我會諗99乘100，唔使計都知係9900，減番99咪係9801囉，其他人仲喺度㩒緊計數機呀！」
Uncle解釋，「學習」最緊要係了解當中嘅道理，再將佢apply喺其他嘅地方。
單靠勤力易被拋離
Uncle仲話，做人都一樣，單靠勤力，樣樣嘢都依住既定嘅方式行，以為唔會出錯，但事實上已經俾人拋離。
打工仔面對咁嘅經濟環境，最緊要係survival，除咗靠勤力，頭腦仲要識轉彎。當然講就容易，但敏妮家陣仲學緊。
溫敏妮
http://wanmanli.com/blogs/