潮流文化1：<br>貽興邊走邊唱　歌賦新主義

潮流文化1：
貽興邊走邊唱　歌賦新主義

執筆之際，是有些遲疑，害怕這篇報道會將又一新興創意文化街道被商業化活埋……前身「印刷街」的歌賦街，由半年前開始，各方人士仿似約埋為該區造勢，齊齊引進新主意店舖。但日漸興盛的背後，卻令小記寒意冒起，它會否成為昨日的蘇豪？小記與王貽興相同感受下，結伴體驗「新蘇豪」中的各種個性。

記者：吳美美、梁俊鵬
攝影：伍慶泉、陳陶鈞
Model︰KathyCheung@starzpeople
Makeup&Hair︰WillOr

為了它繼續生存

隨口問一下身邊年輕人，若有錢自主會選擇那區，中上環地段佔比例大多數，取勝之道在於「休閒」氣氛充斥周圍。而這裏又是否王貽興杯茶？先聽他說心中的休閒生活︰「休閒生活對我嚟講係一落街就有一間茶餐廳或類似Function嘅地方，隨便着乜落去都得，當你心情唔好又可以入去Hea。又或者好似歌賦街嘅舖頭仔咁，你唔知佢做乜又唔知點解佢生存到，但你又好慶幸佢生存到，因為好欣賞佢入面賣嘅嘢，有時甚至會為咗佢能繼續生存而求其幫襯買件嘢，可能係一件Tee或一件擺設。更加希望佢有多啲公共空間，唔使規劃佢做乜，由得佢喺度，最理想就係咁。因為可能你有陣時心情唔好，好想搵個地方去『休閒』，但當你逼完車周圍好多人，你嘅心情同興致已經無晒。其實，我有時都會約朋友嚟呢頭食飯，因為比較靜，而有陣時就好想食呢度嘅豬扒脆脆，所以歌賦街都幾符合我自己嘅休閒生活，可惜𠵱家呢度已經被人炒貴晒。」

■歌賦街、九如坊現變稱作「新蘇豪」，亦是「印刷街」的前身。

沒有路線自由行

大家的腦海中，歌賦街除了九記牛腩、番茄通及其餘各式食肆揚名，時至今日，已陸續聚集了不同類型的Gallery及自家品牌，新概念及二合一店舖亦逐一上場。在歌賦街連接九如坊、善慶街之間的樓梯不斷穿插，走着自己隨心的步行路線，點走點行隨時坐喺路邊都得，香港人行慣的大商場邊可以咁！王貽興說︰「我唔鍾意行商場，因為全部都好似一個倒模咁，例如必定有一間超級市場；而且商場無乜公共空間可以俾人用，連上落電梯都規定你要點上點落，呢個畀人預設嘅遊覽路線我唔鍾意，好憎！歌賦街、中上環呢區就有多啲自己嘅選擇。」

■KIMLAI是自己設計的首飾品牌店。

大富翁惹的禍

香港確實是久違了「非主流」店舖的街道，過往「蘇豪」名存實亡，歌賦街一帶接棒成為「新蘇豪」。但憂慮的事又來了，王貽興說︰「擔心類似小社區可唔可以維持到，因為小店老闆唔係業主，當呢個地方Hit起舖租自然上升，佢哋嘅營業額未必可應付，可能最後又會各散東西，香港已經有好多類似情形。」坦白說，小記過往愛逛蘇豪如maymayking、ChocolateRain等自家小店，但維持不到兩年，整條街漸漸失色，有些進駐商場舖，有些結業不見，香港真的難以打造自己特色街道？「係有困難，因為當中涉及地產商嘅買賣遊戲就好難。好似大富翁玩霸地遊戲，一見地方有商機，就用錢去霸咗呢個地方，跟住就用嚟炒賣，愛這裏的人就永遠聚唔到腳。」
感覺，一如《囍帖街》般無奈。