所謂圓明園國寶，鼠首與兔首銅像在巴黎拍賣，竟然各以一千四百萬歐元賣出，聖羅蘭珍藏拍賣會於是多收近二億八千萬港元。買家是誰，現在未知，希望唔係華人做儍瓜啦，否則又係華人入咗法國人圈套，花盡寃枉錢。
古董收藏大家前輩Ｌ在拍賣前見到左丁山，當然向佢討教鼠首兔首之藝術價值。前輩Ｌ嗤之以鼻：「亂咁講係國寶，其實只係清代工匠之行貨，毫無藝術價值，更與國寶古董相差十萬八千里，中國人太笨嘞，將民族感情與國寶之名灌注入去圓明園十二生肖銅像，只係益晒外國收藏家。冇錯，呢啲肖像係八國聯軍搶咗去嘅，但呢啲物件，唔值得重視，講大咗，畀貝爾熱（聖羅蘭之拍乸）乘機出言勒索，推高價錢㖭！」
前輩Ｌ收藏不少古玩文物，平時十分低調，呢次見到北京氣急敗壞咁嘅樣子，心有不忍，乃真正愛國人士也。鼠首兔首卒之以超高價售出，佳士得收佣收到笑，那管得北京話要制裁佢吖。
請教完前輩Ｌ，碰到軍事專家Ｍ，佢好不滿意本地傳媒掛住講甚麼國寶，新華社破口大罵法國人有強盜基因，而竟然好少報導及抗議俄羅斯軍艦開火擊沉中國貨船「新星號」，導致船員死亡及失蹤，家屬投訴無門。北京為咗二百年前工匠產品而大罵法國，但對新鮮熱辣嘅俄羅斯野蠻行徑，顧左右而言他。
講甚麼中國民族尊嚴，有時十分冇癮。古老死物就說成事關民族尊嚴；中國人被俄國海軍謀殺就話係海上意外，不禁擲筆三嘆。俄羅斯人最識得欺善怕惡搵中國笨，第二次世界大戰，中國抗日戰爭時，蘇聯唔幫中國手，不肯向日本宣戰，但到咗美國在戰事最後階段，向日本投下原子彈，蘇聯立即打落水狗，向日本宣戰，派兵衝入中國東北；到咗金日成攻打南韓，史太林又呃又騙，滾咗毛澤東派志願軍（實即解放軍）過鴨綠江參加韓戰與美國為敵，中國兵傷亡慘重之餘，後來蘇聯仲要向中國追收軍火費。前蘇聯、現俄羅斯成日搵中國笨，點解中俄仍然稱兄道弟呢？對北京嚟講，斯文法國有強盜基因，蠻橫俄羅斯有天賦石油，係唔同啲嘅。