英超嘅曼聯、意甲嘅國際米蘭、西甲嘅巴塞隆拿同埋荷甲嘅阿爾克馬爾（AZ），都喺所屬聯賽彈咗出嚟，但前3隊都冇AZ帶得咁誇張，簡直開行turbo向前衝，請後面對手食塵。仲有一樣嘢AZ贏晒，就係佢哋班波最王道，自己贏波之餘仲帶挈捧場客贏錢，喺𠵱家咁嘅市道底下，想搵多個錢「責」袋，就要長期吼實呢隊「盤王」。
贏多5場夠分攞荷甲
由前阿積士同巴塞隆拿教頭雲高爾領軍嘅AZ，前晚喺荷甲主場對格羅寧根，憑加斯安奴柏利梅開二度，加埋迪比利亦入一粒，大勝3:0；聯賽冇失波同埋連續不敗場數，亦分別增至18場同埋23場，比第2位嘅川迪，多成9分，仲比衞冕嘅燕豪芬多18分，聯賽錦標幾乎成為囊中物。
雲高爾賽後咁講：「我旗下班球員真係打得好好，離聯賽錦標又行近咗一步。」AZ經過25場聯賽後攞咗63分，睇番上季同埋前季，冠軍隊燕豪芬分別攞到72分同埋75分；照咁睇，AZ只要贏多5場左右，就可以繼1981年之後再做荷甲聯盟主。而且，佢哋仲有望成為最快封王嘅歐洲頂級聯賽球隊㖭！
AZ成績咁好，除咗班球員好似艾咸達奧、阿里、迪比利同馬頓馬田斯等，有出色表現外，仲全靠兩大強隊燕豪芬同阿積士失準，加上由前英格蘭主帥麥卡倫領軍嘅川迪冇料到所致。荷甲由04/05球季開始由燕豪芬壟斷，相信唔少球迷都好似我求大俠咁，睇到有啲悶；若然AZ最終攞到聯賽冠軍，應該可以帶畀荷蘭足球一啲新衝擊。除此之外，我求大俠支持AZ嘅另一個原因，就係佢哋係王道球隊，自己贏之餘亦帶挈球迷贏錢。
24場聯賽18場贏盤
數數手指，佢哋今季打咗25場聯賽，24場有開「讓球」或「讓球主客和」，當中有18場贏盤，贏錢比率高達7成5。睇番英超奪標賠率熱到得番1.02倍嘅曼聯，喺26場聯賽得9次贏盤；而國米亦一樣累街坊，25場聯賽8次贏盤；巴塞算係好啲，24場11次贏盤，但比率都係得5成咋！金融海嘯下人人受影響，輕則減薪，重則連份工都冇埋；我求大俠希望AZ可以一路咁贏落去，等廣大球迷有機會賺多個錢傍身。