「勝利」係有代價嘅,墨爾本勝利前日贏完澳職總冠軍,開心過後有排愁。點解?因為隊波面臨被「肢解」嘅命運。35歲隊長梅斯卡特(右)隨時掛靴,哥斯達黎加國腳中場靴南迪斯借用期滿,如果想由佢效力嘅哥國球會LD阿拉胡蘭斯買斷佢,冇話唔得,但佢今年踢得咁好,人哋唔獅子開大口至奇。
至於門將迪奧列托斯同埋中場歷克禾特都已經約滿,正因為今年踢得好,異口同聲話唔想留效,想去歐洲追尋更大成就。再加埋之前已落實被挖走嘅守將懷奧(將會加盟FC悉尼)、特威迪(將會加盟黃金海岸聯)……,如果你有張今年墨爾本勝利嘅全家福,不妨圈出即將離隊嘅球員,你會發現冇咗半隊主力。眼見球隊勢必被「肢解」,難怪教練梅域克(左)灰晒:「今季咁成功,恐怕都可一不可再囉!」