香港足球在八、九十年代曾風光一時，球星湧現，85年的「519」事件更是家喻戶曉，之後亦有在91年的奧運外圍賽，在大球場以3:1擊敗日本奧運隊。當年的一代球星如「大頭仔」胡國雄掛靴後，尚有山度士與李健和等接棒，在出色戰績與球星支持下，孕育了不少本地球迷，當中包括至今仍默默支持香港足球與南華的球迷mo仔。記者：曾雁平 部份相片由南華足球隊提供
昔日篇：因山度士迷上南華
與很多「3字頭」的本地球迷一樣，mo仔小時候在電視收看本地直播賽事，而欣賞到南華中場山度士的精采表現，繼而開始接觸及觀看香港足球。mo仔說：「我在90年代先開始睇本地波，點樣開始？當年勁鍾意效力南華的山度士，見佢咁細粒，但喺球場踢法好瀟灑，又有個人突破，遠射亦不俗；鍾意佢之餘，亦開始支持南華，繼而成為忠實的『擁南躉』。」
mo仔自此開始入場睇波，亦懷念當年的熾熱氣氛。他說：「當年睇波氣氛好好，球迷又多，外援又高質素，同現在比較，確實有好大距離。」
宿敵篇：不敵東方激到喊
去到90年代初，「擁南躉」已風光不再，當時適逢東方王朝於92年崛起，連續3年雄霸本地球壇，在本地賽幾乎無敵，mo仔就記得試過睇住南華俾東方大炒而喊出來。「當年應該是92年的甲組聯賽揭幕戰，南華在旺角場以0:5慘敗在東方腳下，當時喺球場睇波，真係好失望，從來冇諗過南華會輸成咁，結果忍唔住，一路睇波一路抹眼淚。」mo仔說。
縱使南華於90年代初要活在「東方王朝」陰影下，但當年本地波的現場氣氛十足，令他選擇繼續入場觀戰。
今日篇：太多直播損球市
mo仔認為，本地球市難以復興，與電視太多直播外國波有關：「球迷太多選擇，本地波水平又難與歐洲頂級聯賽相比，令入場球迷人數同以前差好遠。現在球迷入場好難投入比賽，因為對球員唔認識，我就見過有球迷入場後喺度打遊戲機。」
他坦言，現在本地波並不好睇，只是作為南華球迷，只要時間許可，還是盡可能與「南華吹水寨」迷一起捧南華場：「球隊始終要球迷支持，我比較鍾意有拼勁的球員，目前南華球員中，最欣賞李志豪同陳志康（圖）。」
mo仔小檔案
年齡：33歲
職業：電子產品設計師
支持南華幾耐：近20年
最喜歡的南華球員：李海強
經典球衣電話繩套裝
南華足球隊為慶祝成立100周年，繼早前推出「紅衫白袖」球衣後，今日推出另一限量紀念精品－－經典球衣電話繩套裝（圖），一套10款，設計精緻的經典球衣的電話繩套裝。
有興趣的球迷，今日3時可在旺角場南華球迷服務處，購買每套180元的電話繩套裝，而南華球迷會會員出示有效會員證，可享折扣，以150元的優惠價購買。
