財爺鬍鬚曾勸喻後生仔唔好太計較，畢業生應該能屈能伸，今年市道唔好，幾千蚊份工都打住先啦，不過好多後生仔對鬍鬚曾言論好反感，有人喺facebook搞咗個group，呼籲財爺以身作則，顯示唔斤斤計較大公無私精神，一於帶頭以4,000蚊實習價出糧，咁就真係香港之福嘞。
等唔到7.1已想上街
呢個group開設幾日已有千幾人加入，可見群情頗為洶湧，有網民指鬍鬚曾做財爺唔合格，理應自動減薪，由實習生開始學習如何做一個稱職財政司司長，咁樣做，用番佢自己講法，長遠而言，對佢自己，甚至對香港都係好事。
鬍鬚曾今年出漫畫收集民意，刻意爭取後生仔支持，點知預算案發表後卻激起年輕人反感，網上有人直斥佢冇腦，又狂數佢七宗罪，包括加煙稅、扮諮詢等等，甚至有人話等唔到7.1，𠵱家就要上街示威抗議。
煲呔話視民望如浮雲，鬍鬚曾亦話不屑派糖博取掌聲，總之為香港好唔怕俾人鬧，咁就應該炒晒所有政治化妝師啦。一旦民怨拖累煲呔民望，八方信你鬍鬚曾夠膽唔開倉！