鍾欣桐（阿嬌）近日積極部署復出，原本頭炮將於本周四（5日）出席代言牛仔褲活動及接拍彭發的三級驚慄片，但由於另一淫照女角張栢芝突現身狂轟陳冠希（Edison），令事件再度哄動全城。阿嬌為免在風頭火勢之時露面，故有關方面決定把牛仔褲活動延期，而她更鐵定辭演彭發新戲，阿嬌復出之路波折重重。
繼日前陳冠希在溫哥華為淫照案作供後，前晚淫照女主角之一張栢芝突然現身接受有線訪問首度開腔回應事件外，更毫不留情狂轟Edison，令淫照事件再度升溫。
代言記招延期
另一女主角鍾欣桐被迫暫別娛圈一年多，最近積極部署復出，近日她先後被拍到跳舞操弗及拜詹瑞文為師學戲，阿嬌早前簽約成為某牛仔褲代言人及拍廣告照，原定復出頭炮是出席本周四記者會，但由於淫照事件再成熱話，阿嬌所屬的英皇為免她在這風頭火勢現身，故此和廣告商商量後，決定把記者會延期。
有消息又指阿嬌會接拍由英皇投資、彭發執導的三級驚慄片，男主角屬意為外國演員，但據知阿嬌看完劇本後，認為新戲太過血腥及暴力，自己並不適合，故已決定推辭。
《志雲飯局》依舊
不過她會照舊接受無綫總經理陳志雲的《志雲飯局》訪問，因為是次訪問早計劃不會安排傳媒採訪，故她毋須面對大批記者提問。另外，內地護膚品牌依奈在網頁上登了阿嬌相片，指她出任新的代言人並會拍廣告。
就牛仔褲記者會延期及阿嬌拍新戲一事向其經理人霍汶希求證，霍汶希昨晚在電話中說：「拍戲嘅事一切都未落實，而記者會根本未定日期。」阿嬌因近日練舞觸及頸部舊患，故她昨日出外看醫生。
撰文：葉雪
台灣播栢芝訪問起紛爭
有線電視娛樂新聞台前晚播出張栢芝首談陳冠希的專訪，除了間接令阿嬌復出受阻外，兩間台灣電視台TVBS與中天電視也因在未經有線授權下播出栢芝訪問片段鬧出糾紛，有線娛樂執行董事徐小明昨稱，TVBS指片段是在YouTube取得也非循正途，他說：「𠵱家有電視台違規，我哋只好交由公司法律部處理啦。」
TVBS發言人張維銘表示：「有線提出抗議後，已經立刻拿掉畫面，但我們是合理引用，播出時不會超過新聞出處影片的三分之一畫面。」中天昨則表示是取得有線授權。
全城熱話
農夫：Edison有心無力
張栢芝首度開腔，令淫照事件再成熱焦點，眾藝人對此均有其不同看法。
農夫：
其實呢件事大家都好慘，大家都係受害者，我哋之前喺多倫多見到Edison嘅時候，佢都有同我哋講，呢一年嚟有為呢件事耿耿於懷，事實佢真係冇嘢可以做到，平心而論佢講呢啲說話好真心，道歉又道歉過，淨係冇私底下講sorry，但係佢都有企出嚟公開講，其實佢係自責。
李力持：
同栢芝合作過《喜劇之王》，佢係出色演員，因為一啲過失，糟蹋一個演員同埋令佢前途盡失，係罪大惡極。之前我有個古裝喜劇係想搵謝霆鋒同栢芝做兩夫婦，不過件事發生就不了了之，總之因為某人疏忽，喪失咗咁好嘅演員，佢仲講埋啲風凉話，佢應該要徹徹底底道一次歉。
周麗淇：
我冇睇個訪問，成件事唔關自己事，唔想畀任何意見。Edison為人係咪栢芝所講咁，以我認識嘅Edison，未去到咁深入嘅程度，大家合作拍過兩套戲，就算有傾偈都未傾到咁深入，真係唔知，所以講乜嘢都唔係太好。
陳芷菁：
張栢芝好勇敢，成件事我唔覺得任何人有錯。至於栢芝指摘陳冠希貓哭老鼠假慈悲，當時係你情我願，唔係強迫，佢話陳冠希唔聽電話，佢要體諒，可能當時全世界嘅記者都搵緊佢，一切都已成過去，佢亦都要放下。我唔覺得陳冠希有幾可惡，佢只係花心啲。
EricKwok：
我梗係支持栢芝，我唔覺佢有錯，影相係個人嗜好同私隱，要負責係放呢啲相同影相嘅人，影相嘅人係要肯定啲相唔會洩露出去，我覺得Edison係做漏咗嘢，就係私下冇同佢哋講對唔住，可能佢都有好多壓力。栢芝都係因為見到Edison喺庭外嘅說話，好嬲所以出嚟講嘢。
吳雨霏：
我同佢（Edison）少咗聯絡，佢（栢芝）都係講番自己感覺出嚟，Edison當時唔應該熄電話，應該要saysorry。