坊間很多兒童演藝戲劇課程，讓無數父母及小孩發發明星夢。但他們卻沒想到戲劇也可以是正規教育的一部份，還佔着重要的地位。海怡寶血小學打破戲劇只是附屬的傳統，將戲劇納入正規課程，然校方亦非為培育明日之星，而是要傳達關懷和愛。
記者：林佩婷
攝影：楊錦文
課外活動變正規課堂
「呢度唔歡迎你，你即刻同我走！」推開舞蹈室的大門，還以為是老師在罵學生，原來是在上一課正規的戲劇課。周圍傳來陣陣對白及討論聲，約30位同學分成6組，為故事分鏡度台詞，討論角色扮演。當老師一叫Action，個個都化身角色主人翁，七情上面！每組演完後還有討論時間，由同學說出別人的優缺點。這時整個課室可謂嘈到爆，但只要老師一拍手，大家都會一齊拍手靜下來。之後還有交流活動，分析故事主人翁心理，最後更有習作。
由課外活動變成正規課堂，規定4至6年級都要上這一課，還特地請由香港演藝學院畢業，進修了戲劇教育碩士的鄧耀興老師（興哥哥）擔任4年級的戲劇導師，目的就是令小朋友能接受更正規的戲劇教育。「3年前，學校見到同學參加完戲劇班後，無論性格同學習都有明顯改變，表達力又強咗，令學校更有生氣，證明戲劇可以感染人，所以決定轉為正規課堂。而且三三四學制，高中同學其中一個選修課程就是戲劇，學校可謂有先見之明，預早讓同學接觸戲劇呢科。」
家境越好越難教
雖然戲劇課不用考試，但興哥哥話透過自度課程，同樣可令學生了解到課堂的宗旨──關懷和愛。「課外活動戲劇班主力令小朋友經歷表演過程，但正規課堂就會多咗故事發展分析，我會利用大家都熟悉嘅故事如《醜小鴨》，再加上自己創作，令同學表演之餘，能夠更深入諗番主角遭遇，從而學識點愛護同尊重他人。我畀佢哋嘅工作紙有啲係故事裏面叫人反省嘅地方，要佢哋透過文字或圖畫寫出嚟，我就更加容易了解佢哋嘅心態。」
通常老師最渴望遇到聰明學生，但興哥哥話這堂課聰明或家境好的同學難教一點。「因為佢哋屋企給予較多保護，要同佢哋講尊重他人或其他生活實況，可能有難度。反而家境無咁好又或自覺得唔到屋企人明白嘅，就容易有共鳴。」
學生：變大膽成熟
6年級麥芷蔚
「學識執生。試過謝幕有同學俾佈景夾住，嗰刻即落幕救佢再謝幕。」
6年級陳熹揚
「對升中有幫助。讀咗3年習慣面對人，對中學新環境都唔怕。」
5年級李文軒
「以前覺得老師惡，做戲後覺得似朋友。上堂講錯嘢都唔驚，因為戲劇無分對錯。」
5年級徐綺蔓
「學識戲劇張力，最重要係參與每個環節，就連道具都有份設計。」
4年級謝永軒
「以前無咩自信，𠵱家大膽咗，上其他堂都鬼馬咗。」
4年級袁焌庭
「上堂要討論交功課，有機會想參演世界名著。」
