退休高官羅范想做東華三院一姐，但被公務員事務局阻住而告吹，羅范要求當局畀個說法，呢單嘢喺官場震撼性，聽聞不下於栢芝站出來，有個倒數咬長糧官員同八方講，好多人都心急想知結果，因為關乎大圍福利也。
據呢位人士講，圍內人近日講起此事，好多人都想羅范站出來，畀封律師信，甚至打場官司更好，事關退休高官應有就業自由。佢又話其實羅范鍊贏政府有前科，舊年羅范參選人大，由於剛剛退休，被人質疑可能違規，聽聞羅范不惜訴諸法律誓要參選，結果政府就範改例，如果羅范呢次都咁有吉士就好咯。
退休高官搵真銀可能有利益衝突，梗係宜緊不宜寬啦，不過八方冇同呢位官員爭拗，只係提醒佢，羅范參選有老左力撐，港府犯不着對着幹，羅范𠵱家有幾多籌碼，佢心中有數。