人人都想放悠長假期，有人就諗到花30萬蚊投番個「H0L1DAY」車牌掛喺架車度，咁咪開車返工都感受到放假氣氛囉！呢個車牌，係運輸署噚日拍賣230個自訂車牌中，成交價最高嘅，可見想放假嘅香港人真係好捨得畀錢。
有人想放假，有人就想做超人，車牌「SUPERMAN」成交價要56,000蚊；好多港女有「公主病」，原來做公主都唔重皮，「PR1NCESS」車牌只需36,000蚊。
更多車主鍾意簡潔，「TC」以21萬蚊成交，係第二最高成交價。「DP」、「FX」同樣以15萬蚊成交，係少數成交價超過10萬蚊嘅自訂車牌，今次車牌拍賣共得款項313.7萬元。