社民連喺立法會「掃場」十分有爭議性，主席毓民噚日黨內團拜時發表講話激勵士氣，佢引用魯迅《立論》話，做人唔怕講真話，就算被千夫所指，都要頂住。副主席陶君行就話，耶穌曾走入聖堂搗亂，因為聖堂已經被人搞到烏煙瘴氣，社民連喺立法會抗爭，就係要趕走牛鬼蛇神。
社民連今日召開行政委員會特別會議，重申「行動派」立場，同時討論日後對策，主調基本已定，就係繼續抗爭，以牙還牙。據講毓民揚言唔怕被譴責失去議席，因為補選形同公投，社民連「派隻豬出選都贏！」
公民黨同民主黨對社民連所為不以為然，卿姐比較有義氣，日前八方指卿姐同社民連劃清界線，有關方面澄清，話當時卿姐只係畀番啲示威道具陳偉業，並非「推」番畀佢咁見外。