英、意、西聯賽強隊近期往往贏一球收工，講刺激、多意外戰果反而首推位列4大聯賽之末嘅德甲波。伸延至德乙亦然，偶然吼中個冷膽，回報不知高過吼中英、意、西熱膽多幾多倍。禮拜日就有場德乙「4哥」鬥「3哥」嘅「大」戰，冷吼凱沙羅頓和格雷特霍夫2:2。
凱沙羅頓雖然被睇好，但其實傷兵唔少，而格雷特霍夫傷兵唔算多，最緊要係射手艾拉古爾、韋辛加大勇，相信今場唔會輸。睇格雷特霍夫近10場作客比賽都攻入17球，呢個作客入球數目相當唔錯，再睇埋呢隊波又幾神經刀，歇冬後炒過恩高斯達特6:1、聖保利3:0，點估到上場作客護級隊科布倫斯要吞三蛋；蠱惑波就揀蠱惑波膽。
吼甘比亞素得「首」
講完外行波，講番意甲，今晚有場巴勒莫對卡坦尼亞嘅南部打吡大戰，戰果難測，令我唔敢放喺意甲大勢過關；但呢度扒冷就唔同，大膽估計，雖然卡坦尼亞作客入波少得可憐，但打吡戰可能係另一回事，加埋「儍豹」本來都唔係咩好貨色，後防又唔穩，可冷吼4.65倍客W，波膽就揀卡軍贏2:1。
意甲夜場，兩軍熟路，戰術又接近，隨時由中後場奇兵破悶局，首選勇於助攻嘅甘比亞素；佢對曼聯近門失機嗰個「首球」，可能喺今場補番數。文︰藍鑽石