栢芝打破沉默站出來，贏到唔少掌聲，好多人話佢身為影后，真係唔好嘥，應該盡快復出，原來栢芝嘅精采表現，連中央高幹都激讚！中聯辦副主任郭莉，噚日出席工商界慶祝三八婦女節酒會時，大讚栢芝有勇氣，市民應該歡迎佢復出。
郭莉主要聯繫本地工商界同婦女組織，作風素來低調，噚日被問到對栢芝狂插陳冠希有乜意見時，竟然破天荒作出評論，盡顯中聯辦一姐風範。
副主任讚勇氣可嘉
郭莉大讚栢芝有勇氣，相信栢芝認為𠵱家有必要講清楚件事，所以站出來，佢又話從女性角度睇，栢芝要求陳冠希還女性尊嚴無可厚非，「我想所有女性都有這種要求，都需要男性尊重。」
郭莉又撐栢芝要求陳冠希道歉言論，「我覺得一個有修養的男性，都應該尊重女性。」至於是否道歉，「這是他自己決定的事情。」連代表中央嘅高幹都開聲，八方認為陳冠希都係接受黨嘅指示，服從黨嘅領導好啲，否則唔慌有運行。
淫照流遍大江南北，郭莉強調自己事忙，冇睇過啲相，但指香港社會多元同自由，有啲行業男女事情可能較開放，但影呢啲相就唔係幾好，「肯定是不好的，肯定對他們有影響。」而且作為公眾人物，應該注意公眾反應同接受程度，維護社會形象。
呼籲公眾支持復出
阿嬌受淫照風暴打擊星途，甚至遭內地封殺，郭莉卻認為公眾應該對犯錯嘅人寬容啲，因為人誰無過，「如果她（栢芝）復出的話，那她必須為觀眾服務，展示她的才華，大家也應該歡迎她。」有郭副主任力撐，栢芝復出肯定順風順水。
自由黨女當家劉健儀噚日都在場，佢覺得栢芝今次好有勇氣，又暗寸阿嬌，「有啲人選擇唔站出嚟，不斷去懊悔，或者不斷揼心口話自己儍，我覺得咁樣就唔夠積極囉。」婦協主席林貝聿嘉就話，栢芝真係勇氣可嘉，又鬧陳冠希影淫照好有問題，好唔尊重女性，「相信佢應該懺悔緊㗎嘞。」佢叫陳冠希快啲向女受害人道歉。兩位女副局長潘潔同許曉暉，噚日喺酒會被問到呢單熱門新聞時都封口不談，高薪副局長同女星比較，相形見絀。
mailto:[email protected]