雷曼苦主大聯盟噚日同「儍強」陳家強寃家路窄，先後接受香港電台訪問。講起財經局局長陳家強出席立法會聆訊表現，聯盟召集人陳光譽直斥儍強講嚟講去，都交代唔到邊個官員要負責，明顯係卸責。
陳光譽又指儍強始終唔肯將雷曼事件定性為系統性問題，「係一開始錯到𠵱家。」
儍強講過如果雷曼唔爆煲，班苦主可以繼續收息，陳光譽話，一聽就知儍強真係唔知迷你債券係乜嘢結構性產品，佢指儍強老婆任職嘅金融大行發行嘅「精明債券」，同雷曼債券嘅結構一模一樣，儍強如果唔熟書，應該問吓老婆，唔做足功課盞獻醜。陳光譽話公開聆訊係照妖鏡，令唔少高官現形。